Вазорати тандурустӣ ва ҳифзи иҷтимоии аҳолии Ҷумҳурии Тоҷикистон

Санаи 21 июли соли равон  Ҷамолиддин Абдуллозода, вазири тандурустӣ ва ҳифзи иҷтимоии аҳолии Ҷумҳурии Тоҷикистон аз рафти корҳои сохтмонии иншооти соҳаи тандурустӣ дар ноҳияҳои Рашт ва Файзобод, ки дар доираи татбиқ гардидани Лоиҳаи “Хизматрасониҳои маҷмӯӣ барои модар ва кӯдак”- и назди Вазорати тандурустӣ ва ҳифзи иҷтимоии аҳолии Ҷумҳурии Тоҷикистон  ҷараён доранд, дидан намуд.

Дар ҳайати гурӯҳи корӣ, роҳбарон ва намояндагони мақомоти иҷроияи ҳокимияти давлатии ноҳияҳои Рашт ва  Файзобод, менеҷери Гурӯҳи татбиқи Лоиҳа Исфандиёр Маҳмудзода ва дигар кормандони Гурӯҳи татбиқи Лоиҳа низ иштирок намуданд.

Қобили зикр аст, ки имрӯзҳо рафти корҳои сохтмонӣ дар 3 ноҳияи таҷрибавии Лоиҳа бо суръати баланд ҷараён дошта, дар назар аст, ки дар ноҳияи Файзобод маркази ташхису табобат, бинои беморхонаи марказӣ, бинои шӯъбаи таваллуд мавриди азнавсозӣ ва таъмири куллӣ қарор дода шаванд.  Дар ноҳияи Рашт бошад, сохтмон ва таъмиру тармими 4 бино; сохтмони маркази ташхису табобат, таъмири бинои беморхонаи марказӣ, маркази саломатии ноҳиявӣ ва бинои хобгоҳ барои занони ҳомила дар назар дошта шудааст. Аз рӯи ҳадафҳои татбиқ гардидани Лоиҳа, дар ноҳияи Шамсиддин Шоҳини вилояти Хатлон  бошад, дар қатори дигар самтҳои муҳим, сохтмони беморхонаи марказӣ ва маркази саломатии ноҳиявӣ низ дар назар дошта шудааст.

Ҷамолиддин Абдуллозода, вазири тандурустӣ ва ҳифзи иҷтимоии аҳолии Ҷумҳурии Тоҷикистон бобати дар сатҳи баланд ва саривақт ба итмом расонидани корҳои сохтмонӣ дар иншооти ноҳияиҳои Рашт ва Файзобод ба масъулон дастур ва супориҳои мушаххас дод.