Тавре қаблан иттилоъ дода будем, бо мақсади мубориза бар зидди бемории сироятии COVID -19 ва табобати сироятёфтагон ду маркази машваратии тиббии боварии Вазорати тандурустӣ ва ҳифзи иҷтимоии аҳолии мамлакат таҳти рақами кӯтоҳи 311 ва 511 фаъол гардиданд.
Аз оғози таъсисёбӣ то имрӯз шумораи зиёди мардум ба ин рақамҳо занг зада, вобаста ба бемории COVID-19 ба саволҳои худ посух гирифтаанд. Ин рақамҳо ба таври шабонарӯзӣ фаъол буда, дар он мутахассисони гуногуни соҳаи тиб ба кор ҷалб карда шудаанд. Телефони боварии 511 моҳи марти соли равон фаъол шуда, рақами 311 пас аз тасдиқ шудани ҳолати бақайдгирии коронавирус фаъолияташро аз 5 май оғоз намуд.
Дар ҳамин ҳол таҳлилҳо нишон медиҳанд, ки вақтҳои охир муроҷиати шаҳрвандон ба телефонҳои боварии мазкур хеле коҳиш ёфтааст.
Масалан, агар қаблан танҳо дар як шабонарӯз ба телефони боварии 311 бештар аз 2000 занги телефонӣ анҷом дода мешуд, танҳо санаи 17 июни соли ҷорӣ ба ин рақам аз ҷониби шаҳрвандон 489 занги телефонӣ анҷом дода шудааст.
Ҳамзамон, давоми рӯзҳои охир муроҷиати шаҳрвандон ба рақами боварии 511 низ хеле коҳиш ёфтааст.
Бояд гуфт, ки коҳиш ёфтани муроҷиати шаҳрвандони кишвар ба телефонҳои боварии 511 ва 311 гувоҳи он аст, ки сокинони мамлакат оид ба масъалаҳои бемории COVID-19 аллакай маълумоти заруриро ба худ гирифтаанд.