Дар Вазорати тандурустӣ ва ҳифзи иҷтимоии аҳолии Ҷумҳурии Тоҷикистон дар доираи Лоиҳаи беҳтаргардонии сифати хизматрасонии тиббӣ ба модарон ва навзодон дар вилояти Хатлон, ки бо дастгирии молиявии Бонки Олмонии Рушд ва дар асоси шартномаи махсуси байналмилалии барномаи ҳамкории молиявии Ҷумҳурии Федеративии Олмон бо Ҷумҳурии Тоҷикистон амалӣ шуда истодааст, ҷиҳати роҳандозии барномаи телетиб дар муассисаҳои тандурустии ноҳияҳои таҷрибавии лоиҳаи мазкур ҷаласаи онлайнӣ доир гардид.
Дар кори ҷаласа муовинони вазир Ғафур Муҳсинзода, Зулфия Абдусаматзода, мушовири байналмилалалӣ Михаэл Вейнхара аз кишвари Олмон ва ҳамзамон ба тариқи онлайн роҳбарият ва кормандони беморхонаҳои таҷрибавии лоиҳа иштирок намуданд.
Бояд гуфт, ки аллакай дар беморхонаҳои шаҳру ноҳияҳои пилотии ноҳия, махсусан, Беморхонаи вилоятии клиникии бисёрсоҳавии шаҳри Кӯлоб, Беморхонаи вилоятии шаҳри Бохтар, беморхонаҳои марказии ноҳияҳои Ёвон, Хуросон, Ҳамадонӣ, Фархор ва Муассисаи давлатии “Пажӯҳишгоҳи илмӣ-татқиқотии акушерӣ, гинекологӣ ва перинталогии Тоҷикистон” бо мақсади роҳандозӣ намудани телетиб таҷҳизоти зарурӣ васл гардидааст.
Ҳамзамон, бо мақсади омӯзонидани мутахассисон дар самти истифодаи барномаи мазкур мушовири байналмилалӣ Михаэл Вейнхара аз кишвари Олмон даъват карда шуд, ки номбуда санаҳои 24 ноябр ва 16 декабри соли равон оид ба истифодабарии телетиб дар ҷаҳони муосир, тарзи дуруст истифода намудани таҷҳизоти телетиб, истифода аз платформаи байналмилалии айпат (iPath) ва дигар ҷабҳаҳои телетиб ба мутахассисони беморхонаҳои шаҳру ноҳияҳои болозикр маълумот пешниҳод намуд.
Зикр гардид, ки дар оянда истифодаи босамари барномаи телетиб барои боз ҳам баланд бардоштани сифати хизматрасонии тиббӣ ба аҳолӣ мусоидат хоҳад намуд.