Имрӯзҳо дар саросари мамлакат корҳои бунёдкориву азнавсозӣ ва аз таъмири капиталӣ баровардани муассисаҳои тандурустӣ, хосатан беморхонаҳо, шӯъбаҳои сироятӣ, эҳёгардонӣ ва бо муосиртарин таҷҳизоти тиббӣ таъмин намудани онҳо бомаром идома доранд.
Дар доираи чунин корҳои ободониву созандагӣ, чанде қабл шӯъбаи наҷот ва ҷарроҳии Муассисаи давлатии “Маркази шаҳрии ёрии таъҷилии тиббӣ”-и шаҳри Душанбе аз таъмири капиталӣ бароварда шуда, бо муосиртарин дастгоҳу лавозимоти тиббӣ таъмин карда шуданд.
Бояд зикр намуд, ки шӯъбаҳои эҳё ва ҷарроҳии муассисаи болозикр бо тарҳу услуби замонавӣ таъмир гардида, бо дастгоҳу лавозимоти муосири тиббӣ, аз қабили дастгоҳҳои нафасдиҳандаи сунъии замонавӣ, монитор, инфузамат, рентгени рақамии мобилӣ, маҷмӯи бронхоскоп, ЭКГ, дефиблятор, рахтҳои хоби замонавӣ, дастгоҳи тозакунандаи ҳаво ва дигар лавозимоти тиббӣ таъмин гардида, ба фаъолият шурӯъ намуданд.
Маврид ба ёдоварист, ки ҳамзамон дар шафати муассиса дастгоҳи истеҳсолкунандаи кислород бунёд ва насб шудааст, ки ба эҳтиёҷмандон дар ҳолатҳои зарурӣ хизмат хоҳад кард.
![](https://moh.tj/wp-content/uploads/2018/04/8678.jpg")
