Бо мақсади баланд бардоштани сатҳу сифати хизматрасонии тиббӣ ба модару кӯдак, тақвияти донишу малакаи табибон ва пешгирии фавт бо ташаббуси Раёсати тандурустии вилояти Хатлон дар Беморхонаи вилоятии клиникии ба номи Бури Воҳидови вилояти мазкур дар мавзуи “Модаршавии бехавф” семинар-машварати омӯзишӣ баргузор карда шуд.
Дар семинари мазкур мудирони шуъбаҳои таввалудӣ, марказҳои солимии репродуктивӣ, шуъбаҳои эҳёгарӣ ва акушер-генекологҳо иштирок намуданд.
Гуфтан ба маврид аст, ки имрӯзҳо дар вилояти Хатлон барои хизматрасонии тиббӣ ба модару кӯдак тамоми шароиту имкониятҳои зарурӣ фароҳам оварда шудааст. Дар вилоят ду маркази перениталӣ-Беморхонаи ҷумҳуриявии ноҳияи Данғара ва Маҷмааи тандурустии “Дӯстии халқҳои Тоҷикистону Ӯзбекистон” фаъолият менамоянд.
Бо дастгирии Ҳукумати Ҷумҳурии Тоҷикистон шуъбаҳои таваллудии беморхонаҳои марказии ноҳияҳои Вахш, Ёвон, Восеъ, Темурмалик ва Ҷалолиддин Балхӣ азнавсозӣ ва бо таҳҷизоту лавозимоти муосири тиббӣ ҷиҳозонида шуданд.
Дар рафти семинари мазкур бори дигар ба иштирокчиён вобаста ба ҳифзи саломатии модару кӯдак, пешгирии фавт, модаршавии бехавф ва дигар масъалаҳои муҳими соҳа маълумот ва тавсияҳои муфид дода шуд.
