Дар Муассисаи давлатии “Маркази ҷумҳуриявии илмии ҷарроҳии дилу рагҳо” ба як марди 31 сола, ки давоми беш аз 25 сол гирифтори бемории трамбози баъди картизатсионии варидҳои чуқури пойҳо буд, амалиёти стентгузории варидӣ бе буриш ва ба тариқи миниинвазивӣ гузаронида шуд.
Ба гуфти Ҷамшед Раҳмонов, мутахассиси маркази номбурда, ки ҷарроҳии мазкурро гузаронидааст, бемор то кунун ба воситаи доруворӣ табобат мегирифт ва ташхиси ҳозиразамон нишон дод, ки рагҳои хунгарди ӯ аз тарафи пойи рост дар масофаи зиёда аз 10см баста шудааст.
Мутахассисони соҳа иброз медоранд, ки табобати анъанавии ингуна беморон то кунун аз он иборат буд, ки аз дигар ҷойи пойи худи бемор раги хунгардро гирифта, иваз мекарданд ва ё дар ҳолати дуруст наомадани раги хунгард, ранҳои хунгарди синтетикӣ истифода бурда мешуд.
Ҳамакнун, бо истифода аз технологияҳои ҳозиразамон, аз қабили таҷҳизоти ангиография, ки бо дастгирии Ҳукумати Ҷумҳурии Тоҷикистон ба Маркази ҷумҳуриявии илмии ҷарроҳии дилу рагҳо дастрас гардидааст, тариқи варид рафта, дар ҷойи тангӣ, ки раги хунгарди пойи рости бемор махкам буд, стент гузошта шуд.
Пас аз ҷарроҳӣ аллакай варами пойи бемор гашта, пурхунии варидҳои зери пуст кам ва захмҳо аллакай ру ба махкамшавӣ оварда расонида истодаанд.
Инчунин, ташхисҳои назоратӣ нишон доданд, ки стент пурра гузаро ва ягон монеа барои рафтани хуни пойи бемор айни ҳол нест ва ҳолати бемор хуб аст.
Маврид ба зикр аст, ки дар самти бемориҳои рагҳои хунгард бемориҳое ҳастанд, ки ҷараёни бисёр вазнин доранд ва солҳои пеш илоҷи табобати онҳо хеле кам буд. Ба ингуна беморон аксаран амалиётҳои ҷарроҳии анъанавӣ гузаронида мешуд ва онҳо солҳои давроз ба даври доруворӣ табобат мегирифтанд. Ва бо сабаби сар задани бархе аворизҳо бархеи онҳо ҳатто маъюб мегардиданд.
Табибони Муассисаи давлатии “Маркази ҷумҳуриявии илмии ҷарроҳии дилу рагҳо” иброз медоранд, ки ҳатто солҳои қабл пойҳои ингуна беморонро бурида мепартофтанд, то онҳоро аз азоб озод кунанд.
Хушбахтона, акнун бо ворид гардидани технологияи ҳозиразамон ва дар кишварҳои хориҷӣ такмил додани донишу таҷрибаи мутахассисони соҳа илоҷи табобати чунин беморон дар кишвар низ пайдо шуд.
