Рӯзҳои 16-17-уми марти соли 2026 дар шаҳри Москваи Федератсияи Россия дар заминаи кластери «Ломоносов»-и Маркази инноватсионӣ-технологии илмии Донишгоҳи давлатии шаҳри Москва форуми “Ҷамъияти солим” баргузор гашт, ки дар он намояндагони Ҷумҳурии Тоҷикистон таҳти роҳбарии муовини вазири тандурустӣ ва ҳифзи иҷтимоии аҳолӣ Ҳабибулло Хайруллозода ширкат варзиданд.
Дар ҷаласаҳои пленарии форуми мазкур як қатор масъалаҳои муҳими соҳа, аз ҷумла “Беҳтарин таҷрибаҳои кишварӣ ва минтақавӣ барои тақвияти тандурустии ҷамъиятӣ”, “Пешгирии хатарҳои рафторӣ дар бемориҳои ғайрисироятии музмин: самаранокии маҳдудиятҳо ва манъкуниҳо” ва дигар самтҳои муҳими соҳаи тандурустӣ мавриди баррасӣ қарор дода шуданд.
Мавриди зикр аст, ки дар доираи иштирок дар ин форум ҳамзамон вохуриҳои дуҷонибаи муовини вазири тандурустӣ ва ҳифзи иҷтимоии аҳолии Ҷумҳурии Тоҷикистон Ҳабибулло Хайруллозода бо котиби давлатӣ ва муовини вазири тандурустии Федератсияи Россия ва муовини директори Муассисаи буҷетии федералии “Маркази миллии тадқиқоти тиббии терапия ва тибби пешгирикунанда”-и Вазорати тандурустии Федератсияи Россия низ доир гашт.
Дар ҷараёни вохуриҳо масъалаҳои тақвият бахшидани ҳамкориҳои дуҷониба дар бахшҳои мавриди таваҷҷуҳи тарафайн мавриди баррасӣ қарор гирифтанд.
