Имрӯз, 7-уми апрели соли равон дар доираи аксияи ҷумҳуриявии “Ҳафтаи саломатӣ ва ҳуқуқи инсон” ва “Рӯзи умумиҷаҳонии тандурустӣ” таҳти унвони «Якҷоя ба суи саломатӣ. Якҷоя ба суи илм” дар муассисаҳои тандурустии шаҳру ноҳияҳои вилояти Суғд шаҳрвандон ба хизматрасонии тиббии ройгон фаро гирифта шуданд.
Тавре аз Раёсати тандурустии вилояти Суғд иттилоъ доданд, аз субҳи барвақт шаҳрвандони шаҳру ноҳияҳои вилоят ба муассисаҳои тандурустӣ ташриф оварда, аз ташхису муоина ва машварати ройгони тиббӣ гузаштанд.
Бо мақсади дар сатҳи баланд ташкил ва баргузор намудани чорабинии мазкур мутахассисони варзидаи соҳавии муассисаҳои тандурустии вилоят сафарбар гардида, онҳо бо истифода аз дастгоҳу таҷҳизотҳои муосири тиббӣ шаҳрвандонро аз ташхису муоинаи ройгон гузарониданд.
Дар рафти суҳбату вохуриҳо бо аҳолӣ аз ҷониби мутахассисони соҳаи тиб доир ба пешгирии бемориҳо, тарғибу ташвиқи тарзи ҳаёти солим, машғул шудан ба варзиш ва дигар масъалаҳои муҳими соҳа маълумот ва тавсияҳои муфид пешниҳод карда шуд.
