Фарзонаи Эмомалӣ, сардори Раёсати ислоҳот, кӯмаки аввалияи тиббию санитарӣ ва робитаҳои байналмилалии Вазорати тандурустӣ ва ҳифзи иҷтимоии аҳолии Ҷумҳурии Тоҷикистон рисолаи номзадии худро дар мавзуи “Ҷанбаҳои муосири хизматрасониҳои тиббӣ-иҷтимоӣ ба кӯдакон ва наврасон дар марказҳои саломатӣ” ҳимоя намуда, сазовори унвони номзади илмҳои тиб гардид.
Рисолаи номзадии Фарзонаи Эмомалӣ ба масъалаи муҳим барои хизматарасонии ёрии тиббӣ-санитарии аввалия, яъне такмил додани хизматрасониҳои ҳамгироишудаи тиббӣ-иҷтимоӣ барои кӯдакон ва наврасон дар марказҳои саломатӣ бахшида шуда, таҳти роҳбарии Набиев Зоир Нарзуллоевич, доктори илмҳои тиб, профессор, сардори Раёсати ташкили хизматрасониҳои тиббӣ ба модару кӯдакон ва танзими оилаи Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ҳимоя карда шудааст.
Муҳимияти мавзуи мазкур аз он иборат аст, ки ҳолати саломатии кӯдакон таҳти таъсири омилҳои тиббӣ-демографӣ ва иҷтимоӣ (сатҳи таҳсили волидайн, таркиб ва некуаҳволии оила, шароити зист, фаъолнокии тиббӣ ва ғайра) қарор гирифта, ба ташаккули шахсияти онҳо таъсири калон мерасонад. Дар чунин шароит таҳия ва ҷорӣ намудани модели ҳамгироишудаи хизматрасониҳои тиббӣ-иҷтимоӣ аҳамияти илмӣ-амалӣ дорад.
Фаъолияти илмӣ-таҳқиқотии Фарзонаи Эмомалӣ дар 15 мақолаи чопӣ дарҷ гардида, 9-адади онҳо бевосита ба мавзуи рисолаи илмӣ бахшида шудаанд.
