10 июни соли 2026 вазири тандурустӣ ва ҳифзи иҷтимоии аҳолии Ҷумҳурии Тоҷикистон Ҷамолиддин Абдуллозода ҷиҳати шиносоӣ бо раванди хизматрасонии тиббӣ, вазъи фаъолияти муассисаҳои тандурустӣ ва ҷараёни корҳои ободониву созандагӣ аз як қатор муассисаҳои тандурустии шаҳри Бохтар дидан ба амал овард.
Номбурда зимни сафари корӣ аз Маркази саломатии шаҳри Бохтар ва Муассисаи давлатии «Беморхонаи клиникии вилояти Хатлон ба номи Бурӣ Воҳидов» боздид ба амал овард.
Ҳамзамон, зимни ташрифи Ҷамолиддин Абдуллозода ба шаҳри Бохтар масъалаи кӯчонидани Маркази саломатии шаҳри мазкур ба ҷои дигар мавриди баррасӣ қарор дода шуд.
Инчунин, дар ҷараёни боздид вазири тандурустӣ аз шуъбаҳои гуногуни муассисаҳои тандурустии мазкур дидан намуда, бо фаъолияти кормандони соҳаи тандурустӣ, шароити ташхису табобат, таъминоти муассисаҳо бо таҷҳизоти тиббӣ ва сатҳи хизматрасониҳои тиббӣ ба аҳолӣ аз наздик шинос гардид.
Ҳамзамон, Ҷамолиддин Абдуллозода бо як қатор беморони бистарибуда, аз ҷумла модарони дар таваллудхона қарор дошта суҳбат анҷом дода, аз ҷараёни табобат ва шароити нигоҳубини онҳо пурсон шуд.
Зимни мулоқот беморон барои ғамхорӣ ва таваҷҷуҳи пайвастаи Ҳукумати Ҷумҳурии Тоҷикистон ба рушди соҳаи тандурустӣ ва беҳтар гардидани шароити хизматрасониҳои тиббӣ изҳори сипосу миннатдорӣ намуданд.
Дар ин замина, таваҷҷӯҳи хоса ба масъалаҳои тақвияти корҳои ободониву созандагӣ ба истиқболи ҷашни бузурги миллии 35 солагии Истиқлолияти давлатии Ҷумҳурии Тоҷикистон, таъмиру тармими шӯъбаҳо зоҳир гардид.
Дар фарҷоми боздид вазири тандурустӣ ва ҳифзи иҷтимоии аҳолии Ҷумҳурии Тоҷикистон ба роҳбарону масъулини муассисаҳои мазкур ҷиҳати боз ҳам баланд бардоштани сатҳу сифати хизматрасониҳои тиббӣ, таъмини муносибати нек бо беморон, риояи меъёрҳои санитарию гигиенӣ ва истифодаи самараноки имкониятҳои мавҷуда дастуру супоришҳои мушаххас дод.
