Аз 25-уми ноябри соли равон дар шаҳри Самарқанди Ҷумҳурии Ӯзбекистон ҷиҳати такмили ихтисоси менеҷмент, идоракунӣ дар самти тандурустӣ, мустаҳкам намудани қувваи коргарӣ ва нигаҳдории тандурустӣ дар Осиёи Миёна даври омӯзишӣ оғоз гардид, ки он то 29-уми ноябри соли равон идома меёбад.
Даври омӯзишӣ дар доираи нақшаи чорабиниҳои Ташкилоти умумиҷаҳонии тандурустӣ гузаронида мешавад, ки дар он намояндагони соҳаи тандурустии як қатор давлатҳои олам иштирок ва доир ба масъалаҳои алоқаманди соҳа мубодилаи афкор менамоянд.
Ҳадаф аз баргузории даври омӯзишӣ-баррасии масъалаҳои роҳбарӣ ва идоракунӣ дар робита бо захираҳои инсонӣ барои саломатӣ ба шумор меравад, аз ҷумла таҳияи сиёсат ва стратегия, иттилоот ва коммуникатсия ва дар амал татбиқ намудани донишҳои навтаринро дарбар мегирад.
Иттилоъ дода шуд, ки барномаи таълимии даври омӯзишӣ дар доираи нақшаи чорабиниҳои ТУТ барои солҳои 2023-2030, инчунин мутобиқсозӣ ва мувофиқат бо ниёзҳо ва мушкилоти барои кишварҳои Осиёи Миёна алоқаманд дар соҳаи тандурустӣ тартиб дода шудааст.
Инчунин дар рафти даври омӯзишӣ масъалаҳои гуногун, аз ҷумла мушкилоти мушаххаси минтақаи Осиёи Марказӣ дар соҳаи тандурустӣ, баррасии далелҳо ва омилҳои марбут ба муҳоҷирати кормандони соҳаи тиб дар Осиёи Марказӣ, баланд бардоштани фаҳмиши Кодекси глобалии ТУТ ва татбиқи он дар амал ва ғайраҳо баррасӣ мегарданд.
Қобили зикр аст, ки дар даври омӯзишӣ роҳбарони як қатор муассисаҳои зерсохтори Вазорати тандурустӣ ва ҳифзи иҷтимоии аҳолии Ҷумҳурии Тоҷикистон низ иштирок доранд.
