Бо мақсади аз наздик шиносоӣ пайдо кардан бо раванди фаъолияти муассисаҳои тандурустӣ ва ҳифзи иҷтимоии аҳолӣ муовини вазири тандурустӣ ва ҳифзи иҷтимоии аҳолии Ҷумҳурии Тоҷикистон Ҳабибулло Хайруллозода ба ноҳияи Ёвон сафари корӣ анҷом дода, бо фаъолияти Беморхонаи марказӣ, Маркази саломатӣ ва Муассисаи давлатии “Хона-интернати пиронсолон ва маъюбони ноҳияи Ёвон” дидан ба амал овард.
Дар ҷараёни сафари корӣ номбурда бо фаъолияти муассисаҳои болозикр аз наздик дидан намуд.
Ҳабибулло Хайруллозода, муовини вазири тандурустӣ ва ҳифзи иҷтимоии аҳолии Ҷумҳурии Тоҷикистон баъди шиносоӣ бо ҷараёни хизматрасонии тиббӣ дар муассисаҳои тандурустӣ ва ҳифзи иҷтимоӣ, аз ҷумла ҳолати санитарию эпидемиологӣ, омодагӣ ба зимистонгузаронӣ бо масъулини соҳаи тандурустии ноҳия масъалаҳои беҳтар кардани сатҳу сифати хизматрасонии тиббиро баррасӣ намуд.
Дар навбати худ номбурда иброз дошт, ки бояд муассисаҳои тандурустӣ ва ҳифзи иҷтимоии аҳолӣ барои муътадил гузаронидани давраи зимистон ҳамаҷониба омодагӣ бубинанд, то раванди хизматрасонӣ ба беморон ва бошандагон боз ҳам хуб ба роҳ монда шавад.
Ҷиҳати боз ҳам беҳтар намудани хизматрасонӣ дар муассисаҳои тандурустӣ ва ҳифзи иҷтимоии аҳолии болозикр аз ҷониби муовини вазири тандурустӣ ва ҳифзи иҷтимоии аҳолии кишвар Ҳабибулло Хайруллозода ба масъулини онҳо дастуру супоришҳои мушаххас дода шуд.
