07-уми июли соли равон дар меҳмонхонаи “Румӣ”-и шаҳри Душанбе оид ба таҳияи лоиҳаи қонуни нави Ҷумҳурии Тоҷикистон “Дар бораи таъмини ҳуқуқ ва ҳифзи иҷтимоии шахсони маъюбиятдошта: асосноккунии зарурати қабули қонун, мушкилот ва роҳи ҳалли онҳо” ҷаласаи машваратӣ баргузор гашт, ки дар кори он Раиси Кумитаи Маҷлиси намояндагони Маҷлиси Олии Ҷумҳурии Тоҷикистон оид ба масъалаҳои иҷтимоӣ, оила ва ҳифзи саломатӣ Муҷибахон Ҷавҳарӣ, муовини вазири тандурустӣ ва ҳифзи иҷтимоии аҳолӣ Шодихон Ҷамшед, директори Агентии давлатии ҳифзи иҷтимоии аҳолии Вазорати тандурустӣ ва ҳифзи иҷтимоии аҳолии Ҷумҳурии Тоҷикистон Абдулло Сафарзода, роҳбари намояндагии Фонди Роза Люксенбург (Олмон) дар Осиёи Миёна ва Қазоқистон Марлис Линке, роҳбари Иттиҳодияи миллии маъюбони Тоҷикистон Асадулло Зикрихудоев, намояндагони як қатор вазорату идораҳо ва дигар сохторҳои дахлдори мамлакат иштирок намуданд.
Нахуст дар ҷаласаи машваратӣ Шодихон Ҷамшед, муовини вазири тандурустӣ ва ҳифзи иҷтимоии аҳолӣ бо сухани ифтитоҳӣ баромад карда, иброз дошт, ки дастгирии табақаҳои ниёзманди аҳолӣ, аз ҷумла маъюбон таҳти таваҷҷуҳи Пешвои миллат муҳтарам Эмомалӣ Раҳмон қарор дошта, дар ин самт пайваста тадбирҳои муҳим андешида мешаванд.
Дар идома Қудратулло Қурбонов, сардори Раёсати ҳифзи иҷтимоии Вазорати тандурустӣ ва ҳифзи иҷтимоии аҳолӣ оид ба “Муаррифии лоиҳаи Қонуни нави Ҷумҳурии Тоҷикистон “Дар бораи таъмини ҳуқуқ ва ҳифзи иҷтимоии шахсони маъюбиятдошта”: асосноккунии зарурияти таҳия ва қабул гардидани лоиҳаи қонун” ба ҳозирин маълумот пешниҳод кард.
Сипас, аз ҷониби як қатор иштирокчиёни ҷаласа доир ба таҳияи лоиҳаи қонуни мазкур фикру андешаронӣ сурат гирифта, дар умум масъалаи мазкур мавриди баррасии ҳамаҷониба қарор дода шуд.
Бояд гуфт, ки ҷаласаи машваратӣ оид ба таҳияи лоиҳаи қонуни нави Ҷумҳурии Тоҷикистон “Дар бораи таъмини ҳуқуқ ва ҳифзи иҷтимоии шахсони маъюбиятдошта: асосноккунии зарурати қабули қонун, мушкилот ва роҳи ҳалли онҳо” то санаи 08-уми июл давом мекунад.
