Бо мақсади аз наздик шиносоӣ пайдо намудан бо фаъолияти муассисаҳои тандурустӣ, таҳлили вазъи кунуни соҳа, бартараф намудани мушкилот ва камбудиҳои мавҷуда ва дар ин замина боз ҳам беҳтар намудани хизматрасонии тиббӣ ба аҳолӣ, аз ҷумла хизматрасонии тиббӣ ба модару кӯдак санаи 25-уми сентябри соли равон муовини вазири тандурустӣ ва ҳифзи иҷтимоии аҳолии Ҷумҳурии Тоҷикистон Зулфия Абдусаматзода бо фаъолияти Беморхонаи марказии ноҳияи Шамсиддин Шоҳин ва Маркази перинаталии вилояти Хатлон дар шаҳри Бохтар шинос шуд.

Аснои боздиди  хеш номбурда бо вазъи хизматрасонии тиббии модарону кӯдакон, шароит ва имкониятҳои муҳайёгаштаи шуъбаҳо, ҳолати дастгоҳу таҷҳизотҳои тиббӣ ва риояи қоидаҳои санитарию эпидемиологӣ  шиносоӣ пайдо кард.

Инчунин, муовини вазири тандурустӣ ва ҳифзи иҷтимоии аҳолии мамлакат бо роҳбарият ва кормандони муассисаҳои мазкур суҳбат анҷом дода, ҷиҳати беҳтар намудани сатҳ ва сифати хизматрасонии тиббӣ ба аҳолӣ ба масъулин дастуру супоришҳои мушаххас дод.