25-уми феврали соли равон дар Маркази саломатии шаҳри Ҳисор таҳти роҳбарии муовини вазири тандурустӣ ва ҳифзи иҷтимоии аҳолии Ҷумҳурии Тоҷикистон Абдухолиқ Амирзода ҷаласаи корӣ доир гашт, ки дар он директори Маркази ҷумҳуриявии иммунопрофилактика, роҳбарият ва кормандони шабакаи муассисаҳои кӯмаки аввалияи тиббию санитарии шаҳри Ҳисор ширкат варзиданд.
Дар ҷаласаи корӣ муовини вазири тандурустӣ ва ҳифзи иҷтимоии аҳолии Ҷумҳурии Тоҷикистон Абдухолиқ Амирзода дастуру супоришҳои роҳбарияти Вазорати тандурустӣ ва ҳифзи иҷтимоии аҳолии кишварро дар самти пешгирии бемориҳои сироятӣ, риояи қоидаҳои санитарию эпидемиологӣ ва дигар масъалаҳои муҳими соҳа ба самъи ҳозирин расонид.
Дар идомаи ҷаласаи корӣ ба масъалаҳои рафти маъракаи иммунизатсия дар шаҳри Ҳисор, пешгирии паҳншавии бемориҳои сироятӣ, риояи қатъии қоидаҳои санитарию эпидемиологӣ дар муассисаҳои тандурустӣ, пурзӯр намудани гардишҳои хонагӣ бо мақсади шиносоӣ пайдо кардан бо вазъи саломатии аҳолӣ, тақвият бахшидани корҳои ободонӣ ва созандагӣ ба истиқболи ҷашнҳои бузурги миллии дар пеш истода ва ғайра таваҷҷӯҳи хоса зоҳир карда шуд.
Пас аз таҳлилу баррасии вазъи соҳа ва масъалаҳои баррасишуда баҳри боз ҳам беҳтар намудани сатҳу сифати хизматрасонии тиббӣ ба аҳолӣ аз ҷониби Абдухолиқ Амирзода ба масъулини соҳаи тандурустии шаҳри Ҳисор дастуру супоришҳои мушаххас дода шуд.
