25-уми феврали соли равон дар Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ҷаласаи навбатии шабакаи миллии «Тавонбахшӣ дар сатҳи маҳал» баргузор гардид, ки дар кори он сардори Раёсати ҳифзи иҷтимоии аҳолии Вазорати тандурустӣ ва ҳифзи иҷтимоии аҳолии Ҷумҳурии Тоҷикистон Фахриддин Юсуфзода, шарикон оид ба рушд, сардорони раёсату шуъбаҳои дахлдори зерсохтори вазорат ва роҳбарони муассисаҳои соҳавӣ иштирок намуданд.

Чорабинӣ дар доираи амалисозии лоиҳаҳои «Масъулияти бештар, зарфияти беҳтар, дигаргуниҳои амиқтар — дастгирии созмонҳои ҷомеаи шаҳрвандӣ барои рушди ҷомеаи фарогир дар Тоҷикистон» ва «Тавонбахшӣ ва дастгирии муштараки маъюбон ва гурӯҳҳои осебпазир, рушди созмонҳои ҷомеаи шаҳрвандӣ ва пешбурди омодагии фарогир оид ба коҳиши офатҳои табиӣ дар Тоҷикистон» баргузор гардид.

Лоиҳаҳои мазкур аз ҷониби Намояндагии Иттиҳоди Аврупо дар Тоҷикистон ва Вазорати корҳои хориҷии Дания маблағгузорӣ гардида, аз ҷониби Миссия Восток дар ҳамкорӣ бо шарикон дар 6 шаҳру ноҳияҳои вилоятҳои Суғд ва Хатлон амалӣ мешаванд. Лоиҳаҳо қисми барномаи «Маъюбият ва фарогирӣ»-и Миссия Восток буда, ба баланд бардоштани иқтидори созмонҳои ҷомеаи шаҳрвандӣ ва беҳтар намудани татбиқи ҳуқуқҳои кӯдакон ва шахсони дорои маълулият равона гардидаанд.

Ҳадафи асосии ҷаласа татбиқи фаъолиятҳо дар асоси модели тавонбахшӣ дар сатҳи маҳал, фароҳам овардани фазои мусоид барои муошират, мубодилаи таҷриба ва муҳокимаи барномаҳои марбут ба маъюбият ва фарогирӣ дар Тоҷикистон арзёбӣ гардид.

Дар анҷом иштирокчиён вобаста ба таҳкими ҳамкориҳои байнисоҳавӣ ва густариши татбиқи модели тавонбахшӣ дар сатҳи маҳал мубодилаи афкор намуда, ҷиҳати рушди ҷомеаи фарогир пешниҳодҳои мушаххас ироа намуданд.