24-уми октябри соли ҷорӣ дар толори Муассисаи давлатии «Донишгоҳи давлатии тиббии Тоҷикистон ба номи Абӯалӣ ибни Сино» бо ибтикори Агентии назорати давлатии молиявӣ ва мубориза бо коррупсияи Ҷумҳурии Тоҷикистон конференсияи муштараки ҷумҳуриявӣ дар мавзуи «Конститутсия – бахтномаи миллат, калиди маърифат ва ташаккули фазои зиддикоррупсионии ҷомеа» баргузор гашт, ки дар он вазири тандурустӣ ва ҳифзи иҷтимоии аҳолии Ҷумҳурии Тоҷикистон Ҷамолиддин Абдуллозода иштирок ва суханронӣ намуд.

Дар кори конфронс намояндагони Ҳукумати Ҷумҳурии Тоҷикистон, роҳбарияти як қатор сохторҳои давлатӣ ва доираи васеи кормандони соҳаҳои гуногун иштирок доштанд.

Конфронси мазкур бо садо додани Суруди миллии Ҷумҳурии Тоҷикистон оғоз гашт.

Дар ин конфронс вазири тандурустӣ ва ҳифзи иҷтимоии аҳолии Ҷумҳурии Тоҷикистон Ҷамолиддин Абдуллозода баромад кард.

Тавре гуфта шуд, давоми солҳои охир маҳз дар натиҷаи андешидани чораҳои муҳиму саривақтӣ омилҳои коррупсионӣ дар миёни кормандони соҳа ба маротиб коҳиш ёфта истодааст.

Маҳз ба роҳ мондани фаъолияти муштарак бо сохторҳои марбутаи кишвар, пурзӯр намудани корҳои фаҳмондадиҳӣ дар байни кормандони соҳа доир ба оқибатҳои номатлуби ин падидаи хатарзо ва андешидани дигар тадбирҳои муассир метавонанд дар решакан намудани коррупсия дар ҷомеа нақши муҳим бозанд.

Вазири тандурустӣ ва ҳифзи иҷтимоии аҳолии Ҷумҳурии Тоҷикистон Ҷамолиддин Абдуллозода барои саҳмгузорӣ дар пешгирии омилҳои коррупсионӣ аз ҷониби директори Агентии назорати давлатии молиявӣ ва мубориза бо коррупсияи Ҷумҳурии Тоҷикистон Сулаймон Султонзода бо медали агентии мазкур “Барои ҳамкорӣ” қадрдонӣ карда шуд.

Барномаи ҷолиби консертӣ бо иштироки ҳунармандони шинохтаи ҷумҳурӣ анҷомбахши конфронси мазкур буд.