17-уми июни соли равон муовини якуми вазири тандурустӣ ва ҳифзи иҷтимоии аҳолии Ҷумҳурии Тоҷикистон аз рафти корҳои сохтмонии Беморхонаи сили кӯдакона дар назди Муассисаи давлатии “Маркази миллии бемориҳои сил, шуш ва ҷарроҳии қафаси сина” дидан ба амал овард.
Тавре иттилоъ дода шуд, айни ҳол дар иншооти навбунёди тандурустӣ корҳои васлу насби таҷҳизоту лавозимотҳо, мумфаршкунӣ ва сазбу хуррамгардонии назди муассисаи тандурустӣ бомаром идома доранд.
Аснои боздид ҷиҳати дар муҳлати муайяншуда ба анҷом расонидани корҳои боқимонда аз ҷониби муовини якуми вазири тандурустӣ ва ҳифзи иҷтимоии аҳолии кишвар ба масъулин дастуру супоришҳои мушаххас дода шуд.
Ҳамзамон, дар Муассисаи давлатии “Маркази миллии бемориҳои сил, шуш ва ҷарроҳии қафаси сина” муовини якуми вазири тандурустӣ ва ҳифзи иҷтимоии аҳолии мамлакат Ғафур Муҳсинзода бо ду нафар табибони олмонӣ, ки дар доираи барномаи Бонки олмонии рушд барои гузаронидани машғулиятҳои омӯзишӣ ва табодули таҷриба бо ҳамтоёни хеш дар самти ташхису табобати бемориҳои сил, шуш ва ҷарроҳии қафаси сина дар Тоҷикистон қарор доранд, вохурӣ намуд.
Зикр гардид, ки дар доираи сафари кории хеш ба Ҷумҳурии Тоҷикистон бо иштироки табибони олмонӣ ва мутахассисони маркази мазкур як қатор амалиётҳои ҷарроҳӣ, машғулиятҳои омӯзишӣ гузаронида хоҳанд шуд, ки ин иқдом баҳри баланд бардоштани донишу таҷриба ва малакаи мутахассисони ватанӣ мусоидат хоҳад кард.
Ғафур Муҳсинзода аз номи роҳбарияти Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ба мутахассисони олмонӣ барои ба роҳ мондани чунин ҳамкориҳо бо табибони кишвар изҳори миннатдорӣ баён карда, иброз дошт, ки ин иқдом баҳри боз ҳам тақвият бахшидани ҳамкориҳои дуҷониба дар соҳаи тандурустӣ мусоидат хоҳад кард.
