Имрӯз, 12-уми июни соли равон вазири тандурустӣ ва ҳифзи иҷтимоии аҳолии Ҷумҳурии Тоҷикистон Ҷамолиддин Абдуллозода бо рафти фаъолияти Муассисаи давлатии “Озмоишгоҳи миллии референсӣ” шинос гашт.
Дар ин муассисаи тандурустӣ Ҷамолиддин Абдуллозода бо рафти хизматрасонии шуъбаҳо ва ҷараёни фаъолияти кормандони озмоишгоҳ шинос гашт.
Зимни суҳбат бо роҳбарият ва кормандони озмоишгоҳи мазкур вазири тандурустӣ ва ҳифзи иҷтимоии аҳолии кишвар Ҷамолиддин Абдуллозода масъалаҳои баланд бардоштани малакаи касбии кормандони низоми озмоишгоҳӣ ва ба такмили ихтисос фаро гирифтани онҳо, боз ҳам беҳтар кардани сатҳу сифати хизматрасонии озмоишгоҳӣ, баҳодиҳии фаъолияти озмоишгоҳҳо ва баҳодиҳии берунии сифати хизматрасонӣ ва ба роҳ мондани усулҳои нави ташхисро баррасӣ кард.
Бояд гуфт, ки вазифаи Озмоишгоҳи миллии референсӣ аз гузаронидани тамоми озмоишҳои клиникӣ, биокимиёвӣ, иммунологӣ, бактериологӣ ва вирусологӣ иборат аст.
Озмоишгоҳи мазкур бо таҷҳизоти муосир муҷаҳҳаз буда, дар он кормандони касбӣ ва соҳибихтисос дар лабораторияи муосири вирусологӣ фаъолият мекунанд.
Дар баробари ин, Озмоишгоҳи миллии референсӣ дорои системаи устувори идоракунии сифат бо расмиёти ҷорӣ ва иқтидори кофӣ барои коркард ва нигоҳдории намунаҳои клиникӣ мебошад.
