Аз 29 то 31-уми октябри соли равон дар шаҳри Манилаи кишвари Филиппин форуми тандурустии Созмони умумиҷаҳонии тандурустӣ баргузор гардид, ки дар он муовини вазири тандурустӣ ва ҳифзи иҷтимоии аҳолии Ҷумҳурии Тоҷикистон Абдухолиқ Амирзода иштирок ва суханронӣ намуд.

Номбурда зимни суханронии хеш доир ба дастоварду муваффақиятҳои Ҷумҳурии Тоҷикистон дар самти мубориза бар зидди бемории сил ва шароиту имкониятҳои мавҷуда барои ташхису табобати беморони сил дар кишвар маълумот дод.

Ҳамин тавр, зимни баргузории форум масъалаҳои дастгирӣ намудани системаҳои тандурустӣ барои омодагӣ ва вокуниш ба пандемияҳои оянда ва системаҳои тандурустии ба иқлим тобовар, аз ҷумла системаҳои тандурустии ҷамъиятӣ барои ҳалли таъсири тағирёбии иқлим ба бемории сил, кӯмаки техникӣ барои маблағгузории чораҳои вокуниш ба бемории сил, тадқиқот ва таҳияи усулҳои нави табобати бемории сил, ваксинаҳо, воситаҳои скрининг ва ташхис дар кишварҳои дар ҳоли рушд қарордоштаи аъзои Созмони умумиҷаҳонии тандурустӣ, таҳкими амнияти ҷаҳонии тандурустӣ, таҳия ва татбиқи механизмҳои муштараки минтақавӣ оид ба пешгирӣ, назорат ва нигоҳубини бемории сил, аз ҷумла системаҳои назорати фаромарзӣ ва протоколҳои ҳамоҳангшудаи табобат ва ғайра мавриди баррасӣ қарор дода шуданд.

Дар рафти ин чорабинии сатҳи баланд ба рушди дуҷониба ва бисёрҷонибаи муносибатҳои судманди соҳаи тандурустӣ ва ҳифзи иҷтимоии кишварҳои аъзои Созмони умумиҷаҳонии тандурустӣ таваҷҷуҳи хоса ҳозир карда шуда, дар ин замина “Ёддошти тафоҳум” барои дастгирии давлатҳои рӯ ба тараққӣ дар бунёди системаҳои тандурустии устувор ба имзо расонида шуд.

Дар маҷмӯъ, чорабинии мазкур ҳамчун ҷузъи ҷудонашавандаи фарогирии умумиҷаҳонии тандурустӣ ва суръат бахшидан ба муборизаи якҷоя бар зидди бемории сил дар кишвраҳои аъзои Созмони умумиҷаҳонии тандурустӣ ва ҷиҳати ноил шудан ба ҳадафҳои миллӣ нақши муҳим хоҳад бозид.