17-уми декабри соли 2025 2-юмин конгресси байналмилалии «Терапия ва тибби профилактикӣ» оид ба шарикии глобалӣ барои саломатии миллатҳо: табобат ва пешгирӣ дар кишварҳои ИДМ ба таври маҷозӣ оғоз гашт, ки дар он намояндагони вазоратҳои тандурустии кишварҳои аъзои ИДМ ва роҳбарони муассисаҳои соҳавии давлатҳои аъзо иштирок намуданд.
Аз ҷониби Вазорати тандурустӣ ва ҳифзи иҷтимоии аҳолии Ҷумҳурии Тоҷикистон дар конгресси мазкур муовини якуми вазир Саломуддин Юсуфӣ ва масъулини вазорат ба таври маҷозӣ ширкат варзиданд.
Муовини якуми вазири тандурустӣ ва ҳифзи иҷтимоии аҳолии кишвар Саломуддин Юсуфӣ дар ин чорабинӣ бо сухани ифтитоҳӣ баромад карда, ташкил ва баргузории онро баҳри густариши ҳамкориҳои кишварҳо дар соҳаи тандурустӣ, аз ҷумла дар бахшҳои терапия ва тибби профилактикӣ зарур шуморид.
Конгресси мазкур як платформаи бисёрҷанбаест, ки дар он равишҳо ва методологияҳои гуногун дар соҳаи тандурустӣ ва пешгирии бемориҳои музмин бо ҳам мепайвандад.
Он таҷрибаҳои байналмилалӣ ва ватанӣ, пешрафтҳои илмӣ ва равишҳои анъанавӣ, муҳаққиқони ҷавон ва коршиносони шинохтаро муттаҳид мекунад. Ин чорабинӣ фазои табодули дониш ва таҳияи қарорҳоест, ки ба ҳалли мушкилоти соҳаи тандурустӣ дар кишварҳои аъзои ИДМ нигаронида шудааст.
Мавриди зикр аст, ки 2-юмин конгресси байналмилалии «Терапия ва тибби профилактикӣ» то 19-уми декабри соли равон бо иштироки намояндагони вазоратҳои тандурустии кишварҳои аъзои ИДМ ба таври маҷозӣ идома хоҳад ёфт.
