Вазорати тандурустӣ ва ҳифзи иҷтимоии аҳолии Ҷумҳурии Тоҷикистон

Бахшида ба Рӯзи кормандони соҳаи тандурустӣ ва ҷашни 31-солагии Истиқлолияти давлатии Ҷумҳурии Тоҷикистон имрӯз, 17 августи соли равон  дар Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ҳамоиши идона доир гардид, ки дар он вазири тандурустӣ ва ҳифзи иҷтимоии аҳолии Ҷумҳурии Тоҷикистон Ҷамолиддин Абдуллозода, муовини вазир Зулфия Абдусаматзода, Раиси Кумитаи иҷроияи ҲХДТ дар ноҳияи Исмоили Сомонӣ  Убайдулло Қурбонзода ва кормандони дастгоҳи марказии вазорат иштирок намуданд.

Нахуст вазири тандурустӣ ва ҳифзи иҷтимоии аҳолии Ҷумҳурии Тоҷикистон ҳамоишро ифтитоҳ намуда, суханро ба Раиси Кумитаи иҷроияи ҲХДТ дар ноҳияи Исмоили Сомонӣ  Убайдулло Қурбонзода  дод.

Раиси Кумитаи иҷроияи ҲХДТ дар ноҳияи Исмоили Сомонӣ  Убайдулло Қурбонзода ҳозирин ва дар симои онҳо кулли кормандони соҳаи тандурустии мамлакатро бахшида ба рӯзи касбиашон табрику шодбош намуда, ба ҳар кадоми онҳо саломативу сарбаландӣ ва дар иҷрои вазифаи пурмасъулият-таъмини солимии шаҳрвандон  барору муваффақият таманно намуд.

Номбурда аз таваҷҷуҳ ва дастгириҳои доимии роҳбарияти ҲХДТ ба соҳаи тандурустӣ ва ҳифзи иҷтимоии аҳолӣ ёдовар шуда, иброз дошт, ки дар фаъолияти ҲХДТ соҳаи тандурустӣ мақоми хоса дорад ва баҳри таъмини солимии сокинони кишвар пайваста тадбирҳои муҳиму назаррас андешида мешаванд.

Дар навбати худ вазири тандурустӣ ва ҳифзи иҷтимоии аҳолии Ҷумҳурии Тоҷикистон Ҷамолиддин Абдуллозода барои дастгириҳои доимӣ аз номи кормандони соҳаи тандурустии кишвар ва роҳбарияти ҲХДТ изҳори сипосу миннатдорӣ баён намуд.

Баъдан, аз ҷониби Кумитаи иҷроияи ҲХДТ дар ноҳияи Исмоили Сомонӣ  ба як қатор кормандони фаъоли вазорат Сипоснома тақдим карда шуд.