Санаи 01-уми декабри соли равон дар Вазорати тандурустӣ ва ҳифзи иҷтимоии аҳолии Ҷумҳурии Тоҷикистон вазири тандурустӣ ва ҳифзи иҷтимоии аҳолӣ Ҷамолиддин Абдуллозода бо директори Бонки олмонии рушд дар Ҷумҳурии Тоҷикистон (KfW) Петар Георгиев вохурӣ намуд.

Ҷамолиддин Абдуллозода, вазири тандурустӣ ва ҳифзи иҷтимоии аҳолии кишвар меҳмонро ба вазорат хайрамақдам гуфта, ҳавасмандии худро ба идомаи ҳамкориҳои самарабахши дуҷониба изҳор дошт.

Ҳамзамон, номбурда ҷаноби Петар Георгиевро ба муносибати директори KfW дар Ҷумҳурии Тоҷикистон таъин шуданаш табрик намуда, ба фаъолияти кории ӯ барору муваффақият таманно кард.

Тавре қайд карда шуд, дар доираи ҳамкориҳои дуҷониба аз тарафи кишвари Олмон бо дастгирии Вазорати федералии ҳамкориҳои иқтисодӣ ва рушд (BMZ) дар соҳаи тандурустии мамлакат корҳои назаррас амалӣ мегарданд, ки KfW ҷузъи муҳими он мебошад.

Дар доираи барномаи тандурустӣ, ки аз ҷониби KfW маблағгузорӣ мешавад, дар чаҳорчӯби лоиҳаи «Саломатии модару кӯдак, ёрии таъҷилӣ» (марҳилаҳои 2-5) дар шаҳрҳои Кӯлоб ва Бохтари вилояти Хатлон ду Маркази перинаталӣ сохта ба истифода дода шуд, ки ба модарон ва кӯдакон ёрии 3-юм мерасонанд.

Инчунин, чор Беморхонаи марказии ноҳиявӣ дар ноҳияҳои Темурмалик, Ҷалолиддини Балхӣ, Вахш ва Восеъ низ аз нав сохта шуда, бо таҷҳизоти муосири тиббӣ пурра муҷаҳҳаз гардонида шуданд. Инчунин, мутахассисони тиб барои баланд бардоштани ихтисоси худ дар муассисаҳои тиббии Олмон дар семинарҳои омӯзишӣ иштирок намуданд.

Дар рафти вохурӣ натиҷаҳои ҳамкориҳои дуҷониба ба таври муфассал мавриди баррасӣ қарор гирифта, баҳри густариши минбаъдаи ҳамкориҳо ҳавасмандӣ зоҳир карда шуд.