Имрӯз, 12-уми июни соли 2026 дар Вазорати тандурустӣ ва ҳифзи иҷтимоии аҳолии Ҷумҳурии Тоҷикистон бо иштироки Зулфия Абдусаматзода, муовини вазири тандурустӣ ва ҳифзи иҷтимоии аҳолии Ҷумҳурии Тоҷикистон ва Ембергенова М.Х., сардори Раёсати ҳифзи саломатии модарон ва кӯдакони Вазорати тандурустии Ҷумҳурии Қазоқистон, инчунин аъзоёни ҳайати қазоқистонӣ, кормандони раёсатҳои ислоҳот, КАТС ва робитаҳои байналмилалӣ, ташкили хизматрасонии тиббӣ ба модарону кӯдакон ва танзими оилаи Вазорати тандурустӣ ва ҳифзи иҷтимоии аҳолӣ ҷамъбасти натиҷаи ташрифи мутахассисон аз Вазорати тандурустии Ҷумҳурии Қазоқистон баргузор гардид.
Зулфия Абдусаматзода меҳмононро пазироӣ намуда, барои ҳамкориҳои мутақобилан судманд дар асоси созишномаҳои баимзорасидаи байниҳукуматӣ аз номи роҳбарияти Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ба гурӯҳи табибони Ҷумҳурии Қазоқистон изҳори миннатдорӣ баён кард.
Баъдан, Ембергенова М.Х., сардори Раёсати ҳифзи саломатии модарон ва кӯдакони Вазорати тандурустии Ҷумҳурии Қазоқистон барои меҳмоннавозии гарм ва фароҳам овардани шароити мусоид барои анҷом додани мубодилаи таҷриба ба роҳбарияти Вазорати тандурустӣ ва ҳифзи иҷтимоии аҳолии Ҷумҳурии Тоҷикистон сипосгузорӣ намуда, ба таври мухтасар аз натиҷаи ташриф ба муассисаҳои таваллудӣ ва кӯдаконаи Вазорати тандурустӣ ва ҳифзи иҷтимоии аҳолии Ҷумҳурии Тоҷикистон маълумот пешниҳод намуд.
Дар навбати худ Зулфия Абдусаматзода, муовини соҳавии вазир оид ба корҳои дар солҳои охир анҷомдодаи Вазорати тандурустӣ ва ҳифзи иҷтимоии аҳолии Ҷумҳурии Тоҷикистон дар самти ҳифзи саломатии модарон ва кӯдакон ба меҳмонон маълумот пешниҳод карда, барои баланд бардоштани сатҳу сифати хизматрасонии тиббӣ ба модарон ва кӯдакон ва давом додани ҳамкориҳои дуҷониба бо Вазорати тандурустии Ҷумҳурии Қазоқистон андешаронӣ кард.
Ёдовар мешавем, ки дар доираи санадҳои қабулгардидаи дуҷониба, мутахассисон аз Вазорати тандурустии Ҷумҳурии Қазоқистон дар ҳайати ташкилотчиёни тандурустӣ, табибони акушер – гинеколог, неонатолог, ҷарроҳони навзодон ва кӯдакон ва табибони кӯдакон ба Ҷумҳурии Тоҷикистон барои мубодилаи таҷриба ташриф оварданд.
Сафари кории меҳмонон аз 8-ум то 12-уми июни соли 2026 идома ёфта, дар ин муддат онҳо аз муассисаҳои давлатии “Маҷмааи тандурустии “Истиқлол”, “Маркази саломатии №15”-и шаҳри Душанбе, “Пажуҳишгоҳи акушерӣ, гинекологӣ ва перинатологии Тоҷикистон”, “Маркази перинаталии шаҳри Бохтар ва Беморхонаи марказии ноҳияи Файзобод боздид намуданд.
