21-уми феврали соли равон вазири тандурустӣ ва ҳифзи иҷтимоии аҳолии Ҷумҳурии Тоҷикистон Ҷамолиддин Абдуллозода бо мақсади шиносоӣ пайдо кардан бо ҷараёни сифати таълиму тарбия ва санҷиши сифати дарсомӯзии донишҷӯён аз рафти таълими кафедраи ҷарроҳии кӯдаконаи Донишгоҳи давлатии тиббии Тоҷикистон ба номи Абуалӣ ибни Сино ва кафедраи кардиология ва онкологияи Донишкадаи таҳсилоти баъдидипломии кормандони соҳаи тандурустии Ҷумҳурии Тоҷикистон дидан ба амал овард.
Зимни боздид аз кафедраҳои мазкур вазири тандурустӣ ва ҳифзи иҷтимоии аҳолии кишвар махсусан бо рафти дарсомӯзии донишҷӯён, инчунин бо раванди таълиму тарбия дар ин муассисаҳои олии таълимӣ шинос гашт.
Дар ҳамин ҷо зимни суҳбат бо устодон ва донишҷӯён вазири тандурустӣ ва ҳифзи иҷтимоии аҳолии мамлакат Ҷамолиддин Абдуллозода дастуру супоришҳои Пешвои миллат муҳтарам Эмомалӣ Раҳмонро дар самти боз ҳам баланд бардоштани раванди таълиму тарбия, омодасозии мутахассисони баландихтисоси соҳаи тиб, беҳтар кардани фаъолияти кафедраҳои таълимии соҳавӣ ва корҳои илмӣ-таҳқиқотӣ дар муассисаҳои олии таълимии тиббӣ ба самъи ҳозирин расонид.
Бо мақсади боз ҳам баланд бардоштани сифати таълиму тарбия, беҳтар кардани фаъолияти кафедраҳо, омодасозии корҳои илмӣ-таҳқиқотӣ ва бартараф кардани мушкилоту камбудиҳои ҷойдошта аз ҷониби вазири тандурустӣ ва ҳифзи иҷтимоии аҳолӣ Ҷамолиддин Абдуллозода ба устодон ва масъулини донишгоҳ ва донишкадаи мазкур дастуру супоришҳои мушаххас дода шуд.
