Имрӯзҳо дар арафаи фарорасии фасли баҳор корҳои ободонӣ, сабзу хуррамгардонӣ ва маъракаҳои ниҳолшинонӣ дар тамоми гӯшаву канори мамлакат бо ҷушу хурӯш идома дошта, дар баробари кормандони касбу кори гуногун ҳар ҳафта бо баргузории шанбегиҳои ниҳолшинонӣ кормандони соҳаи тандурустӣ ва ҳифзи иҷтимоии аҳолии мамлакат низ саҳми хешро дар сабзу хуррамгардонии Ватани азизамон мегузоранд.
Дар доираи дастуру ҳидоятҳои Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, Раиси шаҳри Душанбе муҳтарам Рустами Эмомалӣ дар доираи Нақшаи чорабиниҳои тасдиқгардида 22-уми феврали соли равон дар қитъаи 6-и маҳаллаи Навободи ноҳияи Исмоили Сомонии шаҳри Душанбе ҳашари ниҳолшинонӣ сурат гирифт, ки дар он муовини вазири тандурустӣ ва ҳифзи иҷтимоии аҳолӣ Шодихон Ҷамшед, директори Агентии давлатии ҳифзи иҷтимоии аҳолӣ Абдулҳаким Холзода ва дар умум 400 нафар кормандони соҳаи тандурустӣ ва ҳифзи иҷтимоии аҳолии кишвар фаъолона иштирок дошт доштанд.
Ҳамин тавр, зимни баргузрории чорабинии сабзгардонӣ аз ҷониби кормандони соҳаи тандурустӣ ва ҳифзи иҷтимоии аҳолӣ зиёда 3500 адад дарахти арча шинонида шуд.
Зикр намудан ба маврид аст, ки Пешвои миллат муҳтарам Эмомалӣ Раҳмон пайваста ба масъалаи сабзгардонӣ, ҳифзи муҳити зист ва тозагии муҳити атроф диққати ҷиддӣ медиҳанд ва чунин маъракаҳо ҷузъи муҳими сиёсати экологӣ ва фарҳанги шаҳрдорӣ маҳсуб гардида ба беҳтар шудани сифати зиндагии шаҳрвандон ва зебогии пойтахти кишвар равона шудаанд.
Бояд гуфт, ки минбаъд низ аз ҷониби роҳбарияти Вазорати тандурустӣ ва ҳифзи иҷтимоии аҳолии Ҷумҳурии Тоҷикистон дар маконҳои муайянгардидаи пойтахти мамлакат маъракаҳои ниҳолшинонӣ ташкил ва баргузор карда мешаванд.
