Рушди босуръати илму техника ва дастрасии шаҳрвандон ба воситаҳои муошират, аз ҷумла шабакаҳои иҷтимоии “Вотсап”, “Телеграм” ва ғайра дар замони имрӯз ба як ҳолати маъмулӣ табдил ёфта, ин омил баҳри саривақт аз аҳволи ҳамдигар хабардор гаштан ва мубодилаи маълумот байни одамон мусоидат намояд.
Мусаллам аст, ки танҳо истифодаи дуруст ва манфиатноки шабакаҳои иҷтимоӣ ба манифати кор буда, баръакси он боиси на танҳо паст гаштани одобу ахлоқи наврасону ҷавонон, балки ҳатто дар тарсу таҳлука гузоштани тамоми шаҳрвандон низ гашта метавонад.
Аз ҷумла, дар шабакаи иҷтимоии “Вотсап” айни ҳол сабти овозии як зане, ки шахсияташ номаълум мебошад, доир ба фаълияти як гурӯҳ табибони номаълум ва паҳн кардани бемории хавноке дар кишвар дар гардиш қарор дорад.
Ин зан иддао мекунад, ки гуё имрӯзҳо дар Тоҷикистон як гурӯҳ худро табиб гуфта, бо либосу лавозимоти тиббӣ ва бо баҳонаҳои санҷидани вазъи саломатии шаҳрвандон хона ба хона гашта, бо ин роҳ кадом бемории сироятро паҳн мекардаанд.
Дар идомаи сабти овозии хеш ин зан иброз медорад, ки гӯё дар вилоятҳои мамлакат “ҳолати изтирорӣ” эълон гардида, одамони зиёде тақсим гаштаанд, ки дар натиҷа кадом беморӣ ва ё сироятеро паҳн менамудаанд.
Вазорати тандурустӣ ва ҳифзи иҷтимоии аҳолии Ҷумҳурии Тоҷикистон бо қотеъият иброз медорад, ки хабари мазкур асоси воқеӣ надошта, дар кишвар ҳеҷ гурӯҳи номаълуми табибон фаъолият намекунад.
Паҳн гаштани чунин овозаву ҳангомаҳои бардурӯғ танҳо бо мақсади дар таҳлука афтонидани шаҳрвандон аз ҷониби афроди ғаразнок ва манфиатҷӯ мебошад.
Мавриди зикр аст, ки табибони оилавии муассисаҳои кумаки аввалияи тиббию санитарии кишвар тибқи тартиби муқарраргардида баҳри гузаронидани иммунизатсия, назорати занони ҳомила ва дигар корҳои ба фаъолияташон алоқаманд дар минтақаҳои барояшон вобастагашта пайваста хона ба хона гардиш анҷом медиҳанд, ки дар навбати худ сокинон табибони маҳаллаи худро хуб мешиносанд.
Вазорати тандурустӣ ва ҳифзи иҷтимоии аҳолии Ҷумҳурии Тоҷикистон бори дигар аз шаҳрвандони мамлакат даъват ба амал меорад, ки ба чунин хабару овозаҳои бардурӯғ бовар накарда, дар ҳолати пайдо шудани масъалаҳои хеш доир ба вазъи хизматрасонии тиббӣ саривақт ба муассисаҳои тандурустии маҳалли зисти худ муроҷиат намоянд.
