Санаи 06-уми феврали соли равон дар Вазорати тандурустӣ ва ҳифзи иҷтимоии аҳолии Ҷумҳурии Тоҷикистон вазири тандурустӣ ва ҳифзи иҷтимоии аҳолӣ Ҷамолиддин Абдуллозода бо намояндаи Барномаи рушди Созмони Милали Муттаҳид (БРСММ) дар Ҷумҳурии Тоҷикистон ҷаноби Судипто Мукерҷи мулоқот анҷом дод.
Зимни мулоқот вазири тандурустӣ ва ҳифзи иҷтимоии аҳолӣ Ҷамолиддин Абдуллозода Судипто Мукерҷиро ба муносибати таъйин гардиданаш ба ин мақоми баланд ва пурмасъулият табрику таҳният гуфта, изҳори умедворӣ намуд, ки ҳамкориҳо миёни Вазорати тандурустӣ ва ҳифзи иҷтимоии аҳолӣ ва Барномаи рушди Созмони Милали Муттаҳид дар самти рушди устувори соҳаҳои тандурустӣ ва ҳифзи иҷтимоии аҳолии кишвар боз ҳам тақвият хоҳанд ёфт.
Қайд гардид, ки Барномаи рушди Созмони Милали Муттаҳид аз соли 1993 дар Тоҷикистон фаъолият дошта, дар татбиқи «Стратегияи миллии ҳифзи солимии аҳолӣ то соли 2030» саҳми назаррас дорад.
Дар ҷараёни вохурӣ натиҷаҳои татбиқи лоиҳаҳои Хазинаи Глобалӣ оид ба мубориза бар зидди бемориҳои сил ва ВНМО баррасӣ гардида, беҳтар шудани вазъи эпидемиологӣ ва инфрасохтори соҳаи тандурустӣ, инчунин рақамикунонии соҳа низ мавриди баррасӣ қарор гирифт.
Ҷонибҳо ҳамкориҳои самараноки Барномаи рушди СММ-ро ҳангоми ҳолатҳои фавқулодда, аз ҷумла бартарафсозии оқибатҳои заминларза дар ноҳияҳои Рашт ва Тоҷикобод баланд арзёбӣ намуда, изҳори умед карданд, ки ин ҳамкориҳо минбаъд низ идома хоҳанд ёфт.
