Дар доираи сафари корӣ ба вилояти Суғд 14-уми марти соли равон дар Беморхонаи вилоятии клиникии кӯдаконаи шаҳри Хуҷанд таҳти роҳбарии муовини вазири тандурустӣ ва ҳифзи иҷтимоии аҳолии Ҷумҳурии Тоҷикистон Абдухолиқ Амирзода ҷаласаи корӣ доир гашт, ки дар он масъулини соҳаи тандурустии вилоят, роҳбарият ва кормандони муассисаҳои тандурустии шаҳри Хуҷанд ва ноҳияи Бобоҷон Ғафуров ширкат варзиданд.
Муовини вазири тандурустӣ ва ҳифзи иҷтимоии аҳолии Ҷумҳурии Тоҷикистон Абдухолиқ Амирзода ҷаласаро ифтитоҳ намуда, доир ба ҳадаф ва мақсади баргузории чорабинӣ андешаронӣ кард.
Баъдан, Абдухолиқ Амирзода дастуру супоришҳои вазири тандурустӣ ва ҳифзи иҷтимоии аҳолии мамлакатро доир ба як қатор масъалаҳои муҳими соҳа, аз ҷумла риояи қатъии қоидаҳои санитарию эпидемиологӣ, пурзӯр намудани гардишҳои хонагӣ, назорати беморон, махсусан беморони дар ҳолати вазнин қарордошта, тақвияти корҳои ободониву созандагӣ дар муассисаҳои тандурустӣ ба истиқболи ҷашни бузурги 35-солагии Истиқлолияти давлатии Ҷумҳурии Тоҷикистон ва дигар самтҳо ба самъи ҳозиин расонид.
Дар рафти ҷаласаи корӣ ҳисоботи масъулини Хадамоти назорати давлатии санитарию эпидемиологии вилояти Суғд доир ба вазъи соҳа дар шаҳри Хуҷанд ва ноҳияи Бобоҷон Ғафуров шунида шуда, атрофи он муҳокимаронӣ сурат гирифт.
Пас аз таҳлилу баррасии вазъи соҳаи тандурустӣ аз ҷониби муовини вазири тандурустӣ ва ҳифзи иҷтимоии аҳолии Ҷумҳурии Тоҷикистон Абдухолиқ Амирзода ба роҳбарони муассисаҳои тандурустии шаҳри Хуҷанд ва ноҳияи Бобоҷон Ғафуров дастуру тавсияҳои муфид дода шуд.
