Дар доираи дастуру ҳидоятҳои Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо мақсади сазовор истиқбол гирифтани ҷашни бузурги 35-солагии Истиқлолияти давлатии Ҷумҳурии Тоҷикистон тибқи супориши вазири тандурустӣ ва ҳифзи иҷтимоии аҳолии кишвар Ҷамолиддин Абдуллозода гурӯҳҳои кории вазорат таҳти роҳбарии муовинони вазир бо мақсади шиносоӣ бо раванди корҳои ободониву созандагӣ дар муассисаҳои тандурустӣ, сабзу хуррамгардонии саҳни биноҳо, рафти хизматрасонии тиббӣ ба аҳолӣ ва баррасии дигар масъалаҳои муҳими соҳа ба шаҳру ноҳияҳои тобеи мамлакат сафарбар гардиданд.
Муовини вазири тандурустӣ ва ҳифзи иҷтимоии аҳолӣ Абдухолиқ Амирзода бо фаъолияти беморхонаҳои марказӣ ва марказҳои саломатии шаҳри Ваҳдат ва ноҳияи Файзобод шинос гашт.
Аснои боздид аз муассисаҳои тандурустӣ Абдухолиқ Амирзода ба масъалаҳои беҳтар намудани хизматрасонии тиббӣ ба аҳолӣ, саривақт расонидани ёрии аввалияи тиббӣ ба беморон, риояи қоидаҳои санитарию эпидемиологӣ, риояи одоби муошират бо беморон, иҷрои барномаҳои соҳавӣ ва дигар масъалаҳо таваҷҷӯҳи хоса зоҳир намуд.
Дар ин замина, гуфта шуд, ки баҳри сазовор истиқбол гирифтан аз ҷашни таърихии 35-солагии Истиқлолияти давлатии Ҷумҳурии Тоҷикистон бояд намои беруна ва саҳни биноҳо, шуъбаҳо ва дар умум тамоми муассисаҳои тандурустӣ пурра таъмиру тармим гашта, дар ин самт ҳамаи тадбирҳои муҳим ва саривақтӣ амалӣ карда шаванд.
Вобаста ба масъалаҳои мазкур ба масъулини соҳаи тандурустии шаҳри Ваҳдат ва ноҳияи Файзобод баҳри боз ҳам тақвият бахшидани корҳои ободониву созандагӣ, ба таъмиру тармим фаро гирифтани бунгоҳҳои тиббӣ ва марказҳои саломатии деҳоти дурдаст дастуру супоришҳои мушаххас дода шуд.
Дар идомаи боздид инчунин дигар намояндагони вазорат аз як қатор бунгоҳҳои тиббӣ ва марказҳои саломатии шаҳри Ваҳдат ва ноҳияи Файзобод низ дидан ба амал оварда, дастуру супоришҳои роҳбарияти Вазорати тандурустӣ ва ҳифзи иҷтимоии аҳолии кишварро ба самъи масъулин расониданд.
