Дар доираи иштирок дар иҷлосияи 79-уми Маҷмаи умумии тандурустӣ, ки дар шаҳри Женеваи Конфедератсияи Швейтсария айни ҳол ҷараён дорад, имрӯз, 19-уми майи соли равон вазири тандурустӣ ва ҳифзи иҷтимоии аҳолии Ҷумҳурии Тоҷикистон Ҷамолиддин Абдуллозода бо роҳбари идоракунии грантҳои Фонди глобалӣ барои мубориза бо вируси норасоии масунияти одам (ВНМО -ВИЧ/СПИД), бемории сил ва вараҷа Марк Элдон-Эддингтон вохурӣ намуд.
Дар рафти вохурӣ Ҷамолиддин Абдуллозода барои дастгириҳои пайвастаи соҳаи тандурустии Тоҷикистон дар самти мубориза бар зидди вируси норасоии масунияти одам (ВНМО -ВИЧ/СПИД), бемории сил ва вараҷа ба роҳбарияти Фонди мазкур изҳори миннатдорӣ баён кард.
Ҳамзамон, ҷонибҳо доир ба вазъияти маблағгузории соҳаи тандурустӣ дар саросари ҷаҳон ва оқибатҳои он барои Ҷумҳурии Тоҷикистон, пешрафт дар омодасозии дархости маблағгузорӣ барои давраи нави тақсимоти солҳои 2026-2028, аз ҷумла тағйироти стратегӣ барои давраи 8-уми грантӣ, банақшагирии гузариши нақши гирандаи асосии гранти Фонди глобалӣ ба Вазорати тандурустӣ ва ҳифзи иҷтимоии аҳолӣ дар давраи 8-уми грантии нав ва дигар масъалаҳои мавриди таваҷҷуҳи тарафайн мубодилаи афкор намуданд.
Дар анҷоми вохурӣ баҳри густариши ҳамкориҳои минбаъда ҳарду ҷониб изҳори омодагӣ ва ҳавасмандии хешро иброз доштанд.
