14-уми октябри соли равон дар шаҳри Берлини Ҷумҳурии федеративии Олмон дар доираи баргузории Саммити умумиҷаҳонии тандурустӣ муовини Сарвазири Ҷумҳурии Тоҷикистон Дилрабо Мансурӣ бо Директори минтақавии Дафтари Созмони умумиҷаҳонии тандурустӣ оид ба давлатҳои Аврупо Ҳанс Клюге вохурӣ намуд. Дар вохурии мазкур ҳамзамон вазири тандурустӣ ва ҳифзи иҷтимоии аҳолӣ Ҷамолиддин Абдуллозода иштирок дошт.
Дилрабо Мансурӣ, муовини Сарвазири мамлакат аз номи Ҳукумати Ҷумҳурии Тоҷикистон ба ҷаноби Ҳанг Клюге барои саҳмгузорӣ дар рушди ҳамкориҳои ин ташкилоти бонуфӯзи байналмилалӣ бо Тоҷикистон дар бахшҳои гуногуни соҳаи тандурустӣ изҳори миннатдорӣ баён кард.
Дар ин замина, қайд карда шуд, ки Ҷумҳурии Тоҷикистон тамоми кӯшишро ба харҷ медиҳад, то минтақа саломатии аҳолӣ таъмин бошад. Намунаи таҷрибаи пешқадам дар ин самт ҳуҷҷати ниҳоии ҷаласаи 5-уми машваратии Сарони давлатҳои Осиёи Марказӣ мебошад, ки таҳти роҳбарии бевоситаи Ҷумҳурии Тоҷикистон қабул гардида, “Харитаи роҳ”-ро оид ба дастгирии саломатӣ ва некӯаҳволии кишварҳои Осиёи Марказӣ тасдиқ кардааст.
Ҳамзамон, гуфта шуд, ки самтҳои кунунии рушди соҳаи тандурустӣ дар кишвар- масъалаҳои марбут ба таҳкими кӯмаки аввалияи тиббию санитарӣ, ислоҳоти маблағгузории бахш бо таваҷҷӯҳ ба фарогирии умумии тиббӣ, рақамикунонӣ, дастрасӣ ба доруворӣ ва лавозимоти тиббӣ, инчунин масъалаҳои тавонбахшии маъюбон ва истифодаи технологияҳои ёрирасон барои баланд бардоштани сифати зиндагии онҳо ба шумор мераванд.
Ҳамин тавр, зимни вохурӣ ҳамкориҳои Ҷумҳурии Тоҷикистон бо Ташкилоти умумиҷаҳонии тандурустӣ (ТУТ) дар самтҳои мавриди таваҷҷуҳи тарафайн баррасӣ гардида, ҳамзамон дурнамои ҳамкориҳои дуҷониба низ муайян гардиданд.
