Бо мақсади аз наздик шиносоӣ пайдо намудан бо рафти хизматрасонии тиббӣ ба аҳолӣ, боздид аз рафти фаъолият ва корҳои сохтмонии муассисаҳои тандурустӣ, таҳлилу баррасии вазъи соҳа, аз ҷумла пешгирии бемориҳои сироятиву ғайрисироятӣ дар байни аҳолӣ имрӯз, 21-уми марти соли равон вазири тандурустӣ ва ҳифзи иҷтимоии аҳолии Ҷумҳурии Тоҷикистон Ҷамолиддин Абдуллозода аз як қатор муассисаҳои тандурустии вилояти Суғд, аз ҷумла дар шаҳри Хуҷанд дидан намуд.
Дар доираи сафари корӣ вазири тандурустӣ ва ҳифзи иҷтимоии аҳолӣ бо фаъолияти муассисаҳои тандурустии вилоятӣ ва шаҳрии шаҳри Хуҷанд шинос шуд.
Зимни боздид номбурда бо ҷараёни хизматрасонии тиббӣ ва рафти корҳои сохтмонӣ дар муассисаҳои тандурустӣ дидан карда, бо масъулин ва кормандони соҳа сӯҳбат анҷом дод.
Зимни суҳбат бо масъулин Ҷамолиддин Абдуллозода як қатор масъалаҳои муҳими соҳа, аз ҷумла пешгирии фавти модарон ва кӯдакон, риояи қоидаҳои санитарию эпидемиологӣ, назорати қатъии беморон ва таъмини онҳо бо маводҳои доруворӣ, пешгирии бемориҳои сироятиву ғайрисироятӣ ва ғайраро баррасӣ намуд.
Дар идома номбурда аз автобазаи тиббии вилоятӣ, ки дар он нақлиётҳои ёрии таъҷилӣ нигаҳдорӣ мешаванд, низ дидан ба амал овард. Иттилоъ дода шуд, ки нақлиётҳои ёрии таъҷилӣ баҳри расонидани ёрии аввалияи тиббӣ ба аҳолӣ ҳамеша дар ҳолати омодабош қарор доранд.
Ҷиҳати бартараф намудани мушкилоту камбудиҳои ҷойдоштаи соҳа аз ҷониби Ҷамолиддин Абдуллозода ба масъулин дастуру супоришҳои мушаххас дода шуд.
