Санаи 02-юми октябри соли ҷорӣ вазири тандурустии Ҷумҳурии Қазоқистон Акмарал Алназарова ва вазири тандурустии Ҷумҳурии Ӯзбекистон Худоёров Асилбек Анварович, ки барои иштирок дар ҷаласаи 38-уми Шӯрои ҳамкорӣ дар соҳаи тандурустии давлатҳои аъзои ИДМ дар Ҷумҳурии Тоҷикистон қарор доранд, аз Муассисаи давлатии “Маҷмааи тандурустии “Истиқлол” дидан карданд.
Дар саҳни даромадгоҳи ин муассисаи тандурустӣ ҳайати меҳмононро роҳбарияти Вазорати тандурустӣ ва ҳифзи иҷтимоии аҳолӣ истиқбол намуд.
Бояд гуфт, ки Маҷмааи тандурустии “Истиқлол” яке аз калонтарин муассисаҳои тандурустии мамлакат ба шумор меравад, ки дар он барои ташхису табобати беморон муосиртарин дастгоҳу таҷҳизоти муосири тиббӣ фароҳам оварда шудааст.
Вазирони тандурустии ҷумҳуриҳои Қазоқистон ва Ӯзбекистон аснои ташриф ба ин муассисаи тандурустӣ бо раванди фаъолияти як қатор шуъбаҳо ва дастовардҳои он шинос гаштанд.
Дар ин замина, ба меҳмонон иттилоъ дода шуд, ки дар муассисаи номбурда бо истифода аз дастгоҳу таҷҳизоти муосири тиббӣ нодиртарин амалиётҳои ҷарроҳӣ, махсусан дар мағзи сар низ гузаронида мешаванд, ки барои ба роҳ мондани чунин навгониҳо мутахассисони ватанӣ дар хориҷи кишвар аз такмили ихтисос ва даврҳои бозомӯзӣ гузаштаанд.
Қайд гардид, ки дастовардҳои табибони тоҷик давоми солҳои охир дар тамоми бахшҳои соҳаи тандурустӣ, чӣ дар самти ташхису табобат ва чӣ дар самти ба роҳ мондани усулҳои ҷарроҳӣ маҳз бо дастгирӣ ва таваҷҷуҳи бевоситаи роҳбарияти олии Ҳукумати мамлакат ба даст оварда шудаанд.
