Дар доираи чорабинии муҳими аҳамияти ҷумҳуридошта-машқи омӯзишӣ дар мавзӯи бемории сироятии Гулузиндонак (дифтерия), ки бо дастгирии молиявии Бонки ҷаҳонӣ ва фонди трастии “Барномаи омодагӣ ва вокуниш ба ҳолатҳои фавқулодда дар соҳаи тандурустӣ” (HEPR Program) ва дар доираи татбиқи лоиҳаи “Миллати солими Тоҷикистон” тавассути Созмони умумиҷаҳонии тандурустӣ давоми рӯзҳои 06 ва 07-уми майи соли равон баргузор гашт, имрӯз иштирокчиёни он оиди ин мавзуъ ба озмоишгоҳи бактериологии Муассисаи давлатии “Пажуҳишгоҳи тибби профилактикӣ” ва ба Муассисаи давлатии “Беморхонаи клиникии шаҳрии бемориҳои сироятии кудаконаи шаҳри Душанбе” ташриф оварданд.
Чорабинӣ, ки барои тақвияти иқтидори Тоҷикистон нисбати омодагӣ ва вокуниш ба паҳншавии бемории дифтерия тавассути беҳтар кардани ҳамоҳангсозӣ ва гузоришдиҳӣ, тибқи Қоидаҳои байналмилалии тиббию санитарӣ (2005), идоракунии самараноки намунаҳои биологӣ ва татбиқи чораҳои пешгирӣ ва назорати сироятро дар назар гирифта буд, дар сатҳи баланд ва босалоҳият баргузор гашт.
Бояд гуфт, ки гузаронидани машқи амалӣ (СИМЕКС) оид ба бемории гулузиндонак (дифтерия) хеле муҳим аст, зеро чунин машқҳо ба омодагии воқеӣ ва пешгирии паҳншавии беморӣ мусоидат мекунанд.
Махсусан, СИМЕКС ба кормандони соҳаи тиб ва сохторҳои марбут имкон медиҳад, ки тартиби дурусти вокуниш ба хуруҷи бемориро дар амал санҷанд. Ин маънои онро дорад, ки онҳо меомӯзанд чӣ гуна зуд беморонро муайян, ҷудо (изоляция) ва табобат кунанд.
Дуюм, чунин машқҳо ҳамоҳангии байни муассисаҳо (беморхонаҳо, мактабҳо, хадамоти санитарӣ)-ро беҳтар мекунанд. Барои бемории гулузиндонак, ки тавассути қатраҳои ҳавоӣ паҳн мешавад, ҳамкории дуруст хеле муҳим аст.
Сеюм, СИМЕКС барои баланд бардоштани сатҳи огоҳии аҳолӣ низ кумак мекунад. Дар ҷараёни чунин машқҳо аҳолӣ мефаҳмад, ки нишонаҳои беморӣ (варам кардани ғадудҳои обилавӣ, таб, дард) чӣ гунаанд ва кай бояд ба духтур муроҷиат кунад.
Чорум, он камбудиҳо ва нуқсонҳоро дар система ошкор мекунад. Масалан, норасоии таҷҳизот, кори озмоишгоҳи, мушкилоти иртибот ё таъхир дар вокуниш, ки метавонанд дар ҳолати воқеӣ хатарнок бошанд.
Ниҳоят, ин машқҳо барои пешгирии эпидемия нақши калон доранд, зеро бо омодагии пешакӣ паҳншавии беморӣ зудтар зери назорат гирифта мешавад.
