Бо мақсади дастрасии аҳолӣ ба хизматрасониҳои босифати тиббӣ ҳамасола дар саросари олам 7-уми апрел ҳамчун Рӯзи умумиҷаҳонии тандурустӣ қайд карда мешавад.

Бахшида ба ин сана бо дастгирии Ҳукумати Ҷумҳурии Тоҷикистон санаи 05-ум апрели соли равон аз соати 8.00 то 12.00 дар тамоми муассисаҳои тандурустии мамлакат, аз ҷумла дар муассисаҳои ҷумҳуриявӣ, марказҳои саломатӣ, беморхонаҳои вилоятҳо ва шаҳру ноҳияҳо машварат ва ташхису муоинаи ройгони шаҳрвандон (ба истиснои ташхису табобати гаронарзиш) гузаронида хоҳад шуд.

Қобили зикр аст, ки чорабинии расмии Вазорати тандурустӣ ва ҳифзи иҷтимоии аҳолии кишвар бахшида ба Рӯзи умумиҷаҳонии тандурустӣ санаи 05-уми апрели соли равон дар Муассисаи давлатии «Пажӯҳишгоҳи гастроэнтерологияи Ҷумҳурии Тоҷикистон» бо иштироки роҳбарияти вазорат, устодону профессорон ва мутахассони баландпояи соҳавӣ баргузор мегардад.

Ҳамзамон, аз ҷониби устодони муассисаҳои олӣ ва касбии таълимии тиббӣ бо доираи васеи аҳолӣ суҳбатҳо ва машваратҳои тахассусӣ баргузор хоҳад шуд.

Аз шаҳрвандони мамлакат даъват ба амал меорем, ки дар ин чорабинӣ иштирок намудаву аз имконият ва шароити мусоид истифода бурда, вазъи саломатии хешро боз ҳам беҳтар намоянд.

Ёдовар мешавем, ки имсол Рўзи умумиҷаҳонии тандурустӣ таҳти шиори «Оғози солими ҳаёт – гарави ояндаи некуфарҷом» қайд карда мешавад.