Дар доираи ҳамкориҳои судманди Ҷумҳурии Тоҷикистон бо Ҷумҳурии Исломии Эрон дар соҳаи тандурустӣ чанде қабл як гурӯҳ мутахассисони ин кишвар ба Тоҷикистон ташриф оварда, бо ҳамтоёни хеш табодули таҷриба намуданд. Аз ҷумла радиолог Муртазо Сонеи Тоҳирӣ ба Муассисаи давлатии “Маркази ҷумҳуриявии тиббию гинетикӣ”-и Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ташриф овард.
Номбурда дар якҷоягӣ бо мутахассисон, аз ҷумла акушер-гинекологон ва функсионалистони соҳаи акушерӣ-гинекологии шаҳри Душанбе ташхиси то таваллудӣ, яъне скрининги пренаталӣ ба 22 нафар занҳои ҳомила дар муҳлати 11-14 ва 18-21 ҳафтаи ҳомиладорӣ гузаронид.
Дар рафти ташхиси скрининги пренаталӣ дар 5 нафар зани ҳомила нуқсон ва иллатҳои ирсии модарзодии тифл дар дохили батни модар дарёфт гардид.
Ҳамзамон оид ба ташхисҳои муосири тиббӣ дар самти дарёфти нуқсон ва иллатҳои модарзодии тифл, навгониҳои ташхисии бемориҳои занона низ бо иштироки мутахассиси эронӣ ва табибони маркази мазкур семинар-машварати амалӣ баргузор гашт.
Инчунин дар ҷараёни машғулияти омӯзишӣ ба як нафар зан дар ҳолати баланди Синдром Даун амалиёти инвазивии Амниосентез, озмоиши обҳои назди тифлӣ низ гузаронида шуд.
Бояд гуфт, ки ҳадаф аз ташкил ва баргузор намудани чунин вохурӣ ва семинар-машваратҳои амалӣ бо иштироки мутахассисони варзидаи кишварҳои хориҷӣ-ин пеш аз ҳама баланд бардоштани сатҳу сифати хизматрасонии тиббӣ ба модарон, савияи донишу таҷриба ва малакаи мутахассисони ватанӣ ба шумор меравад.
Ёдовар мешавем, ки дар доираи ин сафар ҳамзамон мутахассисони эронӣ дар дар як қатор муассисаҳои тиббию табобатии ҷумҳуриявӣ ва шаҳри Душанбе низ бо ҳамтоёни тоҷики хеш оид ба ташхису табобати бемориҳои гуногун низ табодули таҷриба намуданд.
