7-уми октябри соли равон дар шаҳри Боку ва минтақаҳои озодшудаи Қарабоғи Ҷумҳурии Озарбойҷон IV Конфронси байналмилалӣ оид ба масъалаи шахсони бедаракшуда дар доираи «Муколамаи Боку оид ба шахсони бедаракшуда» баргузор гардид.
Дар кори конфронс ҳайати Ҷумҳурии Тоҷикистон бо иштироки намояндагони мақомоти дахлдори давлатӣ ширкат варзид.
Аз ҷониби Вазорати тандурустӣ ва ҳифзи иҷтимоии аҳолии Ҷумҳурии Тоҷикистон дар ин конфронс Абдулло Сафарзода, директори Агентии давлатии ҳифзи иҷтимоии аҳолӣ ва Шодиҷон Абдукаримзода, директори Муассисаи давлатии «Маркази ҷумҳуриявии экспертизаи тиббию судӣ» иштирок намуданд.
Бояд гуфт, ки конфронс ба масъалаҳои ҷустуҷӯ ва муайян намудани сарнавишти шахсони бедаракшуда, таҳкими ҳамкории байналмилалӣ ва байниидоравӣ, истифодаи усулҳои муосири ташхис ва идентификатсияи шахсият, инчунин ҳифзи ҳуқуқу манфиатҳои оилаҳои шахсони бедаракшуда бахшида шуда буд.
Дар ҷараёни чорабинӣ масъалаҳои марбут ба нақши сохторҳои тиббӣ ва экспертизаи тиббию судӣ дар муайян намудани шахсияти шахсони номаълум, истифодаи имкониятҳои муосири таҳқиқоти генетикӣ, экспертизаи судӣ-тиббӣ, ҳамкории мутахассисон ва мубодилаи таҷрибаи байналмилалӣ мавриди баррасӣ қарор гирифтанд.
Масъалаи идентификатсияи шахсият тавассути усулҳои муосири ташхиси судӣ-тиббӣ ва молекулавӣ-генетикӣ аз самтҳои муҳими ҳамкории касбӣ ба шумор меравад. Дар ин раванд ҳамоҳангсозии фаъолияти мақомоти ҳифзи ҳуқуқ, муассисаҳои тиббӣ, мақомоти бақайдгирии аҳолӣ ва муассисаҳои экспертизаи судӣ аҳамияти махсус дорад.
Иштироки намояндагони Ҷумҳурии Тоҷикистон дар чунин ҳамоиши байналмилалӣ имконият фароҳам меорад, ки таҷрибаи кишварҳои гуногун дар самти ҷустуҷӯ, муайян намудани шахсияти шахсони бедаракшуда ва истифодаи технологияҳои муосир омӯхта шуда, робитаҳои касбӣ бо мутахассисони хориҷӣ таҳким ёбанд.
Ҳамчунин, иштироки ҳайати Тоҷикистон дар конфронси байналмилалии Боку барои рушди минбаъдаи ҳамкории байналмилалӣ дар самти экспертизаи тиббию судӣ, идентификатсияи шахсият, таҳқиқоти генетикӣ ва ҳифзи ҳуқуқу манфиатҳои оилаҳои шахсони бедаракшуда заминаи мусоид фароҳам меорад.
Конфронси мазкур яке аз майдонҳои муҳими байналмилалӣ барои мубодилаи таҷриба, таҳкими эътимод ва ҷустуҷӯи роҳҳои самараноки ҳалли масъалаи шахсони бедаракшуда ба ҳисоб меравад.
