Имрӯз, 08-уми июни соли равон ҷиҳати шиносоӣ пайдо кардан бо рафти хизматрасонии тиббӣ ба аҳолӣ ва раванди корҳои ободониву созандагӣ вазири тандурустӣ ва ҳифзи иҷтимоии аҳолии Ҷумҳурии Тоҷикистон Ҷамолиддин Абдуллозода ба шаҳри Ҳисор сафари корӣ анҷом дода, бо фаъолияти Беморхонаи марказии шаҳр ва шуъбаи бемориҳои руҳӣ дидан кард.
Дар доираи сафари кории хеш номбурда аз Беморхонаи марказии шаҳри Ҳисор дидан кардаву бо фаъолияти шуъбаҳо, ҳолати таҷҳизотҳои тиббӣ ва шароиту имкониятҳои он шинос гашта, баҳри боз ҳам беҳтар кардани сатҳу сифати хизматрасонии тиббӣ ба аҳолӣ ба роҳбарият ва кормандони он дастуру супоришҳои мушаххас дод.
Ҳамзамон вазири тандурустӣ ва ҳифзи иҷтимоии аҳолӣ аз рафти корҳои ободониву созандагии шуъбаи бемориҳои руҳӣ низ дидан кард.
Зимни суҳбат бо масъулини соҳаи тандурустии шаҳри Ҳисор Ҷамолиддин Абдуллозода як қатор масъалаҳои муҳими соҳа, аз қабили пешгирии фавти модару кӯдак, ба роҳ мондани усулҳои нави ташхису табобат, назорати қатъии беморон, аз ҷумла беморони дар ҳолати вазнин қарор дошта, саривақт ҷавоб додан ба муроҷиати шаҳрвандон, истифодаи дурусти таҷҳизотҳои тиббӣ, боз ҳам беҳтар кардани фаъолияти кӯмаки аввалияи тиббию санитарӣ, аз ҷумла ёрии таъҷилӣ ва дигар масъалаҳоро баррасӣ намуда, баҳри рафъи мушкилоту камбудиҳои ҷойдоштаи соҳа ба роҳбарияти муассисаҳои тандурустии шаҳри мазкур дастуру супоришҳои мушаххас дод.
Дар ин замина, баҳри истиқболи сазовор аз ҷашни бузурги миллии 35 солагии Истиқлолияти давлатии Ҷумҳурии Тоҷикистон тақвият бахшидани корҳои ободониву созандагӣ дар муассисаҳои тандурустӣ низ махсус таъкид гардид.
