Санаи 14-уми майи соли равон муовини аввали вазири тандурустӣ ва ҳифзи иҷтимоии аҳолии Ҷумҳурии Тоҷикистон Саломуддин Юсуфӣ
ба Муассисаи давлатии таълимии “Коллеҷи тиббии ҷумҳуриявӣ” ташриф оварда, аз ҷараёни корҳои сохтмонии анҷомшудаи клиникаи наздиколлеҷии муассиса боздид ба амал овард.
Номбурда зимни боздид бо рафти корҳои сохтмонии анҷомшуда шинос шуда, ба сатҳу сифати иҷрои корҳо, риояи муҳлатҳои муайянгардида ва истифодаи босамари имкониятҳо таваҷҷуҳи махсус зоҳир намуд.
Роҳбарияти муассиса иттилоъ дод, ки корҳои сохтмонӣ тибқи нақша идома дошта, барои сари вақт ва бо сифати баланд ба истифода супоридани иншооти ҷашнӣ, ки ба 35 – солагии Истиқлолияти давлатии Ҷумҳурии Тоҷикистон бахшида мешавад, тамоми чораҳои зарурӣ андешида шудаанд. Ҳамчунин, роҳбари муассиса изҳори умедворӣ намуд, ки бо мавриди истифода қарор гирифтани иншооти нав, имкониятҳои таълимӣ боз ҳам беҳтар гардида, барои донишҷӯён шароити муосири таҳсил фароҳам оварда мешавад.
Дар анҷоми боздид ба масъулини соҳа ва сохтмончиён ҷиҳати риояи меъёрҳои сохтмонӣ, дар муҳлати муқарраргардида ва бо сифати баланд анҷом додани корҳои сохтмонӣ ва тезонидани раванди сохтмон дастуру тавсияҳои мушаххас дода шуд.
Бояд қайд намуд, ки бунёди иншооти мазкур барои беҳтар намудани шароити таълим ва омодасозии мутахассисони соҳаи тиб, гузаронидани машғулиятҳои амалӣ ва мукаммал гардонидани малакаҳои касбии донишҷӯён аҳамияти муҳим дошта, ба рушди низоми тандурустии кишвар мусоидат менамояд.
