Дар вилояти Суғд бо дастгирии Агентии давлатии ҳифзи иҷтимоии Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ва бо кумаки техникии лоиҳаи “Навсозии ҳифзи иҷтимоӣ ва ҳамгироии иқтисодӣ” машғулиятҳои амалӣ ва омӯзишӣ барои нозир – коргузорони сатҳи ҷамоатҳои шаҳраку деҳоти вилоят оид ба раванди амалисозии механизми таъин ва пардохти кумакпулии унвонии иҷтимоӣ ба оилаҳо ва шаҳрвандони камбизоат имрӯз, 10 июн оғоз гардида, то санаи 14 июни соли равон давом меёбанд.
Мавриди зикр аст, ки чорабинии мазкур дар партави иҷрои қарори Ҳукумати Ҷумҳурии Тоҷикистон аз 30 августи соли 2024, №488 “Дар бораи Тартиби таъин намудани кумакпулии унвонии иҷтимоӣ, муайян намудани андозаи он ва шаҳрвандон (оилаҳо)-и камбизоат дар Ҷумҳурии Тоҷикистон” бо мақсади таҳким бахшидани малакаи касбии нозир – коргузорони сатҳи ҷамоатҳо ташкил карда шудааст.
Дар рафти чорабинӣ шунавандагон оид ба ҳадафи ҳифзи иҷтимоии аҳолӣ ва кори иҷтимоӣ дар Ҷумҳурии Тоҷикистон, санадҳои меъёрии соҳаи ҳифзи иҷтимоии аҳолӣ, мақсад ва тартиби расонидани кумакҳои иҷтимоӣ, механизми расонидани кумакпулии унвонии иҷтимоӣ ва қоидаҳои назорати дастраснамоии он ба аҳолӣ, кор бо аҳолӣ ва меъёрҳои ахлоқии рафтори нозир-коргузорон маълумот мегиранд. Ҳамчунин, онҳо бо тартиби кори системаи иттилоотии кумаки унвонии иҷтимоӣ (АСИСТ) ва бо чораҳои фаъоли мусоидат ба шуғли аҳолӣ шиносоӣ пайдо карда, дарсҳои амалии заруриро барои азхудкунии тартиби коргузорӣ дар самти таъин ва пардохти кумакпулӣ мегузаранд.
Ҷиҳати дастгирии методӣ шунавандагон бо маводи зарурӣ барои истифода дар кор таъмин хоҳанд шуд.
