18-уми январи соли равон дар Вазорати тандурустӣ ва ҳифзи иҷтимоии аҳолии Ҷумҳурии Тоҷикистон таҳти роҳбарии вазири тандурустӣ ва ҳифзи иҷтимоии аҳолии Ҷумҳурии Тоҷикистон Ҷамолиддин Абдуллозода вобаста ба таҳлилу баррасии вазъи хизматрасонии тиббӣ ба аҳолӣ дар шаҳри Душанбе ҷаласаи корӣ доир гашт, ки дар он муовинони вазир Шодихон Ҷамшед, Зулфия Абдусаматзода, сардори Раёсати танудурустии шаҳри Душанбе Хушвахт Шарифзода, сардорони як қатор раёсату шуъбаҳои дастгоҳи марказии вазорат ва роҳбарони муассисаҳои тиббию табобатии шаҳри Душанбе иштирок намуданд.
Нахуст вазири тандурустӣ ва ҳифзи иҷтимоии аҳолии мамлакат Ҷамолиддин Абдуллозода он дастуру супоришҳое, ки аз ҷониби Пешвои миллат муҳтарам Эмомалӣ Раҳмон санаи 17-уми январи соли равон зимни Маҷлиси васеи Ҳукумати Ҷумҳурии Тоҷикистон вобаста ба боз ҳам беҳтар ба роҳ мондани вазъи хизматрасонии тиббӣ ба аҳолӣ ва дигар масъалаҳои алоқаманди соҳа ироа гардиданд, ба самъи ҳозирин расонид.
Дар идомаи ҷаласаи мазкур масъалаҳои пешгирии фавти модар ва кӯдак, бемориҳои сироятӣ, ба такмили ихтисос фаро гирифтани кормандони соҳа ва як қатор масъалаҳои дигар низ мавриди таҳлилу баррасии амиқ қарор гирифтанд.
Дар анҷоми ҷаласаи корӣ аз ҷониби вазири тандурустӣ ва ҳифзи иҷтимоии аҳолӣ ҷиҳати бартараф намудани мушкилоту камбудиҳои ҷойдоштаи соҳа ва дар ин замина боз ҳам беҳтар кардани сатҳу сифати хизматрасонии тиббӣ ба аҳолӣ дастуру супоришҳои мушаххас дода шуд.
