Аз ҷониби мутахассисони Маркази назорати давлатии санитарию эпидемиологии вилояти Суғд дар шӯъбаи бемориҳои сироятии Беморхонаи ноҳиявии №4-и Ҷамоати деҳоти Унҷии ноҳияи Бобоҷон Ғафуров таҳлили вазъи бемориҳои сироятӣ, аз ҷумла бемории зардпарвини шадиди вирусии намуди «А», гузаронида шуд.
Зимни таҳлил вазъи эпидемиологӣ, ҷараёни табобати беморон ва чораҳои пешгирии паҳншавии беморӣ мавриди баррасӣ қарор гирифтанд.
Дар ҷараёни боздид директори Маркази назорати давлатии санитарию эпидемиологии вилояти Суғд Раҳмонзода Султон Раҳмон иштирок намуда, бо беморон ва волидайни онҳо суҳбат анҷом дод. Ба онҳо оид ба роҳҳои сироятёбӣ, риояи қоидаҳои гигиенаи шахсӣ, истифодаи оби безарар, шустани дастон ва дигар тадбирҳои пешгирии бемории зардпарвини вирусии намуди «А» корҳои фаҳмондадиҳӣ гузаронида шуданд.
Таъкид гардид, ки риояи қоидаҳои санитарию гигиенӣ ва муроҷиати саривақтӣ ба муассисаҳои тиббӣ яке аз омилҳои асосии пешгирии паҳншавии бемориҳои сироятӣ мебошад.
