Давоми се моҳи соли 2019 дар қаламрави вилояти Хатлон 3 адад марказ ва 9 адад бунгоҳи саломатии деҳот сохта ба истифода дода шуда, айни замон сохтмони 11 бунгоҳи саломатии дигар идома дорад.
Дар ин бора аз Раёсати тандурустии вилояти Хатлон ба moh.tj иттилоъ доданд.
Тибқи иттилои манбаъ, дар рӯзҳои ҷашни Наврӯзи байналмилалӣ дар ноҳияҳои Ёвон, Ҷ. Балхӣ ва Хуросон бунгоҳҳои саломатии “Заркамар”, “Истиқлол”, “Навзамин”, “Ҷавонӣ”, “Баҳористон” ва Маркази саломатии деҳоти Лоҳутӣ ва ҷамоати деҳоти Холевард ба истифода дода шуданд.
Қобили зикр аст, ки айни ҳол дар қаламрави вилояти Хатлон 28 адад маркази саломатии ноҳиявӣ ва шаҳрӣ, 364 маркази саломатии деҳот ва 706 бунгоҳи саломатӣ фаъолият менамоянд.
Иттилоъ дода шуд, ки дар ин давра бо мақсади баланд бардоштани савияи дониши кормандони соҳа ба Донишкадаи таҳсилоти баъдидипломии кормандони соҳаи тандурустии Ҷумҳурии Тоҷикистон ва шӯъбаи Донишкадаи таҳсилоти баъдидипломӣ дар шаҳри Бохтар ва дар маркази тахсилоти баъдидипломии Донишгоҳи давлатии тиббии Тоҷикистон ба номи Абӯалӣ ибни Сино 95 нафар шунаванда аз шаҳру ноҳияҳои вилоят ба таҳсил фаро гирифта шудаанд, ки аз онҳо 18 нафар табибон ва 84 нафар кормандони миёнаи тиб мебошанд.
![](https://moh.tj/wp-content/uploads/2018/04/8678.jpg")
