2-юми апрели соли равон муовини якуми вазири тандурустӣ ва ҳифзи иҷтимоии аҳолӣ Ғафур Муҳсинзода дар ҷаласаи якуми гурӯҳи корӣ оид ба тасдиқ, таҳлил ва паҳн кардани натиҷаҳои тадқиқоти нимсолаи давраи “FASTR” иштирок ва бо намояндагони миссияи Бонки ҷаҳонӣ вобаста ба фаъолияти лоиҳаи “Миллати солими Тоҷикистон” ба тариқи маҷозӣ вохурӣ намуд.
Ғафур Муҳсинзода, муовини якуми вазири тандурустӣ ва ҳифзи иҷтимоии аҳолии Ҷумҳурии Тоҷикистон барои дастгириҳои пайвастаи соҳаи тандурустӣ ва ҳифзи иҷтимоии аҳолии мамлакат ба ҷониби Бонки ҷаҳонӣ изҳори миннатдорӣ баён кард.
Қайд гардид, ки дар кишвар дар соҳаи тандурустӣ ва ҳифзи иҷтимоии аҳолӣ бо маблағгузории бонки мазкур якчанд лоиҳаҳо бомуваффақият амалӣ шуда истодаанд, ки ин нишонаи ҳамкориҳои мутақобилан судманди ин бонк бо Ҳукумати Ҷумҳурии Тоҷикистон мебошад.
Ҳамин тавр, дар ҷаласаи корӣ муаррифӣ ва муҳокимаи натиҷаҳои пешакии ду даври омӯзишии “FASTR” оид ба арзёбии даврии муассисаҳои кӯмаки аввалияи тиббию санитарии мамлакат баргузор гашт.
Тавре гуфта шуд, ин равиш имкон медиҳад, ки дар бораи вазъи кунунии кумаки аввалияи тиббию санитарӣ дар саросари кишвар, аз ҷумла дар бахшҳои кадрӣ, мавҷудияти инфрасохтор, доруворӣ, шароити санитарӣ ва ғайра маълумоти боэътимод ва саривақтӣ дастрас гардад.
Бояд гуфт, ки лоиҳаи “Миллати солими Тоҷикистон” дар доираи татбиқи “Стратегияи миллии ҳифзи саломатии аҳолии Ҷумҳурии Тоҷикистон барои давраи то соли 2030” таҳия гардида, ҳадафи он боз ҳам беҳтар намудани сатҳ ва сифати хизматрасонии тиббӣ ба аҳолӣ дар мамлакат мебошад.
Дар идомаи ҷаласаи маҷозӣ иштирокчиён доир ба самтҳои гуногуни татбиқи лоиҳаи “Миллати солими Тоҷикистон” мубодилаи афкор намуданд.
