Бо мақсади гузаштани даври омӯзишӣ ва баланд бардоштани савияи дониш дар заминаи Донишгоҳи улумпизишкии “Эрон”-и шаҳри Теҳрони Ҷумҳурии Исломии Эрон аз 6 то 17-уми октябри соли равон як гурӯҳ мутахассисони тоҷик иборат аз 24 нафар, аз қабили роҳбарони як қатор марказҳои саломатии шаҳру ноҳияҳо ва табибони акушер гинекологҳо ба донишгоҳи мазкур сафарбар карда шуданд.
Зимни ифтитоҳи расмии даври омӯзишӣ, ки дар донишгоҳи мазкур сурат гирифт, вазири тандурустӣ ва ҳифзи иҷтимоии аҳолии Ҷумҳурии Тоҷикистон Ҷамолиддин Абдуллозода ба таври маҷозӣ иштирок ва суханронӣ намуда, аз ҳамкориҳои судманди ду кишвар дар бахши тандурустӣ ва ҳифзи иҷтимоии аҳолӣ ёдовар шуд.
Ҳамзамон номбурда аз табибони тоҷик даъват ба амал овард, ки бо истифода аз шароиту имконоти фароҳамгардида дар даври омӯзишӣ фаъолона иштирок намуда, сатҳи дониши ихтисосии худро боз ҳам баланд бардоранд.
Маврид ба зикр аст, ки ҳадафи иштироки табибони кишвар дар ин даври омӯзишӣ табодули таҷриба байни роҳбарони системаҳои тандурустии Эрон ва Тоҷикистон оид ба масъалаҳои кумаки аввалияи тиббию санитарӣ (КАТС) ба шумор меравад.
Дар ин замина, яке аз ҳадафҳои асосии барномаи даври омӯзишӣ мубодилаи таҷрибаи Эрон дар таҳия ва татбиқи системаи самараноки КАТС мебошад. Иштирокчиёни даври омӯзишӣ бо ҷузъҳои калидӣ, ки ба муваффақияти модели эронии КАТС мусоидат кардаанд, махсусан дар деҳот ва минтақаҳои камбизоат шинос мешаванд. Ин мубодила ба рушди иқтидори роҳбарони соҳаи тандурустӣ ва табибони Тоҷикистон тавассути пешниҳоди равишҳои амалӣ, ки метавонанд ба системаи тандурустии кишвар мутобиқ карда шаванд, равона карда шудааст.
Ҳамзамон, иштирокчиёни даври омӯзишӣ бо сохторҳои идоракунӣ, қоидаҳо ва нақши давлат дар таъмини дастрасӣ ба хизматрасониҳои тиббӣ шинос мешаванд. Ин ба табибони тоҷик имконият медиҳад, ки таҷрибаҳои идоракунии худро баррасӣ намуда, самтҳои беҳбуди сиёсати тандурустии Тоҷикистонро муайян намоянд.
Барномаи даври омӯзишӣ ҳамзамон иштирокчиёнро бо таҷрибаҳои беҳтарини ҷаҳонӣ дар самти КАТС шинос мекунад. Бо ташриф овардан ба муассисаҳои тиббӣ ва ҳамкорӣ бо коршиносони байналмилалӣ, иштирокчиён метавонанд ба татбиқи моделҳои муассири кумаки аввалия назари васеътар пайдо кунанд.
