Санаи 27-уми феврали соли равон дар Вазорати тандурустӣ ва ҳифзи иҷтимоии аҳолии Ҷумҳурии Тоҷикистон таҳти роҳбарии муовини якуми вазири тандурустӣ ва ҳифзи иҷтимоии аҳолӣ Ғафур Муҳсинзода ҷиҳати ба роҳ мондани гардиши электронии ҳуҷҷатҳо дар дастгоҳи марказӣ ва муассисаҳои зерсохтори вазорат машғулияти омӯзишӣ доир гардид, ки дар он кормандони дастгоҳи марказии вазорат иштирок намуданд.
Муовини якуми вазири тандурустӣ ва ҳифзи иҷтимоии аҳолии Ҷумҳурии Тоҷикистон Ғафур Муҳсинзода доир ба зарурияти ба роҳ мондани гардиши электронии ҳуҷҷатҳо, дастуру супоришҳои роҳбарияти олии Ҳукумати мамлакат дар ин самт ва дигар масъалаҳои алоқаманди соҳа баромад кард.
Дар идомаи даври омӯзишӣ сармутахассиси соҳавии Вазорати тандурустӣ ва ҳифзи иҷтимоии аҳолӣ оид ба идоракунӣ ва рақамикунонии системаи иттилоотии соҳаи тандурустӣ, директори Муассисаи давлатии “Маркази иттилоотӣ ва низоми ҳифзи иҷтимоии аҳолӣ”-и Вазорати тандурустӣ ва ҳифзи иҷтимоии аҳолӣ Ҷаборов Бежан Акобирович доир ба тарзи ба роҳ мондани системаи гардиши электронии ҳуҷҷатҳо ба ҳозирин маълумот пешниҳод кард.
Қайд карда шуд, ки ба роҳ мондани гардиши электронии ҳуҷҷатҳо дар фаъолияти корӣ талаботи замон буда, он пеш аз ҳама ба осон кардани тарзи корбарии ҳуҷҷатҳо равона гардидааст.
Дар навбати худ, иштирокчиён доир ба паҳлуҳои гуногуни масъалаи мазкур саволҳо дода, аз ҷониби масъулин посухҳои мушаххас гирифтанд.
