Аз 2 то 3-юми апрели соли равон дар шаҳри Берлини Ҷумҳурии Федеративии Олмон Саммити глобалии шахсони дорои маълулият баргузор мегардад, ки дар он ҳайати Ҷумҳурии Тоҷикистон таҳти роҳбарии муовини вазири тандурустӣ ва ҳифзи иҷтимоии аҳолии Ҷумҳурии Тоҷикистон Шодихон Ҷамшед иштирок дорад. Дар ҳайати Ҷумҳурии Тоҷикистон намояндагони ташкилотҳои ҷамъиятии дорои имконияташон маҳдуд низ шомил мебошанд.

Бояд гуфт, ки ин аввалин иштироки намояндагони шахсони дорои маълулият аз Ҷумҳурии Тоҷикистон дар чунин ҳамоиши сатҳи ҷаҳонӣ мебошад ва он қадами муҳим дар таҳкими сиёсати фарогир ва густариши ҳамкориҳои байналмилалӣ ба шумор меравад.

Дар ин чорабинии сатҳи баланд намояндагони як қатор кишварҳои гуногуни олам ба ҳам омада, масъалаву мушкилотҳои шахсони дорои маълулиятро баррасӣ хоҳанд кард.