30-юми майи соли равон вазири тандурустӣ ва ҳифзи иҷтимоии аҳолии Ҷумҳурии Тоҷикистон Ҷамолиддин Абдуллозода сокини 85-солаи ноҳияи Мир Сайид Алии Ҳамадонии вилояти Хатлон Азизов Назар, ки айни ҳол дар шаҳри Душанбе истиқомат менамояд, дар хонааш аёдат намуда, бо вазъи саломатии он шинос шуд.
Тавре наздиконаш иттилоъ доданд, Азизов Назар 15-уми декабри соли 1940 дар деҳаи Анҷиркони ноҳияи Мир Сайид Алии Ҳамадонии вилояти Хатлон ба дунё омадааст.
Аснои аёдати номбурда Ҷамолиддин Абдуллозода иброз дошт, ки дастгирии ҳамаҷонибаи пиронсолон дар кишвар дар мадди назари Пешвои миллат муҳтарам Эмомалӣ Раҳмон қарор дошта, ин қишри ҷомеа пайваста мавриди таваҷҷуҳ ва ғамхорӣ қарор дода мешаванд.
Дар идома вазири тандурустӣ ва ҳифзи иҷтимоии аҳолӣ ба масъулини соҳаи тандурустии шаҳри Душанбе ва Маркази ҷумҳуриявии илмии саратоншиносӣ супориш дод, ки ҷиҳати ба ташхису табобат фаро гирифтан сокини 85-солаи ноҳияи Мир Сайид Алии Ҳамадонии вилояти Хатлон Азизов Назар дар Маркази ҷумҳуриявии илмии саратоншиносӣ бистарӣ карда шавад.
Ҳамзамон, имрӯз Ҷамолиддин Абдуллозода, вазири тандурустӣ ва ҳифзи иҷтимоии аҳолии кишвар дар Маркази тиббии шаҳрии №1 ба номи Карим Ахмедови шаҳри Душанбе низ бо ҷараёни табобати беморон, аз ҷумла беморони калонсол шинос гашта, инчунин бо мутахассисони дигар соҳаҳо дар самти табобати онҳо машварат гузаронид.
Ҷиҳати таҳти назорат қарор додани ҷараёни ташхису табобати беморони калонсол ва таъмини ҳифзи саломатии онҳо аз ҷониби вазири тандурустӣ ва ҳифзи иҷтимоии аҳолии мамлакат ба роҳбарияти Раёсати тандурустии шаҳри Душанбе ва муассисаҳои тандурустии пойтахти мамлакат дастуру супоришҳои мушаххас дода шуд.
