16-уми июни соли ҷорӣ дар толори “Сино”-и Пажӯҳишгоҳи тибби бунёдии Донишгоҳи давлатии тиббии Тоҷикистон ба номи Абуалӣ ибни Сино вохӯрии вазири тандурустӣ ва ҳифзи иҷтимоии аҳолии Ҷумҳурии Тоҷикистон Ҷамолиддин Абдуллозода бо хатмкунандагони донишгоҳи мазкур доир гардид.
Дар рафти вохӯрӣ масъалаи тақсимоти мутахассисони ояндадори соҳаи тандурустӣ ба ҷойи кор мавриди баррасӣ қарор гирифт. Таъкид гардид, ки ҳукумати мамлакат соҳаи маориф ва тандурустиро яке аз соҳаҳои муҳиму афзалиятноки сиёсати иҷтимоии давлат қарор дода, самтҳои мазкур пайваста зери таваҷҷӯҳи роҳбарияти олии сиёсии мамлакат қарор доранд.
Зикр шуд, ки дар партави сиёсати маорифпарваронаи Пешвои муаззами миллат, Президенти Ҷумҳурии Тоҷикистон муҳтарам Эмомалӣ Раҳмон имрӯз дар бахши тандурустӣ шароити муосири таълим ва кору фаъолияти тиббӣ фароҳам оварда шудааст ва инак вақти он расидааст, ки хатмкунандагони ин даргоҳ донишу маҳорати андухтаи хешро барои халқу Ватан сафарбар намоянд. Ҳамзамон, масъалаи саривақт ҳозир шудан ба ҷойи кор, хизмати содиқона ба халқу зодгоҳ масъалаҳои дигари вохурӣ ҳисобида шуданд.
Дар навбати хеш хатмкунандагон қавл доданд, ки ҳамеша қасами тиббиро пос медоранд, вориси арзандаи Сино будани хешро исбот менамоянд, ғамхориҳои Пешвои муаззами миллатро эҳтироми самимӣ мегузоранд ва ба халқу миллати куҳанбунёди хеш содиқона хизмат менамоянд.
